Polis a stòp tur trabou di transporte di santu ku tabata tuma lugá ku trùk

Riba djadumingu 23 di yüli alrededor di 2 or di atardi,  polis a stòp temporalmente tur trabou di transporte di santu ku tabata tuma lugá ku trùk for di ‘Roro Pier’ (waf di mei mei) pa un otro sitio. Esaki despues ku ‘meldkamer’ sentral a haña notifikashon ku e trùknan tabata manehá ku velosidat haltu i ku durante e transportashon, santu tabata basha riba kaminda públiko. Pa e motibu aki, shofùr di un skuter a slep ku su skuter i a kai. E akshonnan di e shofùrnan di trùk ta krea situashonnan peligroso pa tur usuario di kaminda públiko. Pa e motibu aki, polis a disidí di sera kaya pa evitá kualke aksidente. E partidonan enbolbí a risibí instrukshon pa limpia kaminda i na momentu ku esaki ta seif pa uso, lo habrí e kaminda di nobo pa kontinuá ku e trabounan di transportashon.

Kuerpo Polisial Hulanda Karibense ta hasi un yamada na tur esnan responsabel, pa tene nan mes na Lei. Si bo ta transportá santu òf kualke otro material, bo ta legalmente responsabel pa esaki no resultá riba kaminda públiko, lokual por kousa polushon i un situashon peligroso. Si bo no tene bo mes na esaki, polis lo para e trabou te na momento ku e situashon ta korekto, tumando tur medida pa sigurá ku esaki no ta bolbe sosodé.