Jonathan Wever lo hasi e Masters Degree di MEMOS den 2024-2025
Dialuna atardi den sala di reunion na oficina di COA, hunto cu Presidente Wanda Broeksema y Secretaria General Nicole Hoevertsz, a firma e acuerdo final pa asina hoben tecnico di COA, esta Jonathan Wever, por cuminsa e proceso pa participa na e Masters Degree MEMOS, cu ta e “Executive Masters in Sport Organisation Management”, cu ta patrocina pa “Olympic Solidarity”. Cu e oportunidad aki, ta brinda e tecnico deportivo cu tin 2 aña ta traha di cerca cu e federacionnan deportivo cu ta forma parti di COA un oportunidad pa amplia su conocimento pa asina por asisti COA y e federacion riba un nivel administrativo y di maneho.
Tur esaki cu e meta pa mehora e calidad di servicio cu lo brinda nos deporte na Aruba. Den aña 2022 Jonathan a logra termina e curso di “Ciencias Aplicadas al Deporte” na e Centro de Alto Rendimiento (CAR) na Sant-Cugat, Barcelona. Ademas Jonathan a participa na e simposio pa Comitenan Olimpico na Olympia, Grecia, asina cuminsando e trayecto pa amplia e conocimento den e mundo Olimpico den varios aspecto. Awor e trayectoria aki ta wordo amplia cu e tesis cu Jonathan lo traha y presenta, cu tin como topico; “Identificar debilidades estructurales dentro de las federaciones deportivas locales y crear planes efectivos de mejora”.
Jonathan a scohe pa hasi esaki den e idioma spaño, como den nos region esaki ta e idioma predominante. Por medio di e topico aki, Jonathan ta spera di dialoga cu nos federacionnan local y asina tambe ofrece un ayudo adicional na e topico, y asina hasi bon uso di loke lo studia pa yuda nos deportenan.
Comite Olimpico Arubano ta felicita Jonathan cu e logro di wordo acepta pa por hasi e masters aki y ta desea hopi exito den e siguiente aña academico.
