Dos siman pasa diahuebs, 8 di oktober 2020, mi a tuma nota di un publicacion di 24ora.com cu e titulo: “Husticia a drenta cas y oficina di politico di POR”.
Segun 24ora.com desde diaranson, 7 di oktober 2020, mi persona ta ser considera como sospecheso den e caso ‘Flamingo’ y cu un grupo di polis forma pa Landsrecherche, RST y Cuerpo Policial di Aruba lo a tene un inval na mi cas y despues lo a bai na mi oficina riba mi propiedad. Esaki sinembargo, no ta cuadra cu e berdad!
Te cu e dia di awe mi no a ricibi ningun notificacion cu mi ta wordo considera como un sospechoso den e caso penal ‘Flamingo’. Tampoco te cu e dia di awe ni Landsrecherche, RST of Cuerpo Policial di Aruba a tene un inval na mi cas of oficina. Ta di lamenta cu 24ora.com ta busca sensacionalismo y publica un articulo cu contenido eroneo sin a trata di verifica e informacion prome cu publica esaki. E publicacion eroneo di 24ora.com no solamente tin consecuencia pa mi persona, sino e publicacion ta inhustamente afecta mi famia tambe. Innecesariamente mi nomber ta wordo lastra den (social) media pa via di e articulo aki. Esaki ta un dolor enorme pa mi famia mas ainda cu 24ora.com ta publica informacion incorecto.
Atentamente,
Ronny Maduro.