Den un declaracion impactante, parlamentario Edgar Vrolijk (MEP) a cuestiona severamente e decision di 11 miembro di Parlamento cu a duna luz berde pa e proceso di e Rijkswet HOFA sigui su curso. Segun Vrolijk, e decision aki ta representa un capitulacion di nos autonomia financiero y un falta di capasidad pa defende e podernan cu e Statuto di Reino ta brinda Aruba.
Finansa: For di asunto autonomo pa “asunto di Reino”
Vrolijk a splica cu, segun Articulo 3 di Statuto, finansa no ta den e lista di topiconan cu mester wordo regla pa Reino (manera defensa of paspoort). Finansa semper tabata un derecho autonomo di Aruba. Sinembargo, pa medio di e presion aki, Hulanda ta logrando converti esaki den un asunto di Reino, caminda e decision final lo no sinta mas na Aruba, sino den e Tweede Kamer na Hulanda cu su 150 miembronan.
“E push cu Hulanda ta haciendo pa converti finansa di pais Aruba den un asunto di Reino ta keda un punto di gran preocupacion,” Vrolijk a declara.
Critica riba e “capasidad” di e 11 parlamentarionan
E parlamentario tabata hopi directo den su critica hacia su coleganan cu a vota na fabor:
- Falta di conocemento: Segun Vrolijk, e parlamentarionan aki no tin e capasidad pa compronde e poder cu nan tin pa defende Aruba.
- A bende autonomia pa interes: El a señala cu nan a opta pa e caminda di Reino en bes di prepara y lucha pa un “begrotingskamer” local, locual lo a mantene e control na Aruba mes.
- Decision contra pueblo: “E 11 parlamentarionan aki a kies pa Hulanda y no pa Aruba, un decision contra nan propio pais y pueblo,” el a enfatisa.
E rastro di “Mala Fe” desde 2020
E caminda pa yega na e punto aki tabata un di presion constante. Vrolijk a recorda cu for di aña 2020, durante e pandemia, Hulanda a actua di “mala fe”un punto cu e propio Conseho di Estado (Raad van State) a yega di señala.
“Nan a pone Aruba scoge: sea bo ta acepta un ley di Reino of bo no ta haya prestamo. Y awor den 2025, e presion a sigui: si bo no acepta e ley, nan ta claba bo cu un interes castigador di 6.9%,” e parlamentario a splica. Un trato cu Hulanda a duna Aruba contra statuto unda cu mester yuda otro y traha cu otr den Reino Hulandes manera nan mes ta menciona cada bes cu palabra pero no cu echos.
Un cadena structural pa futuro
Vrolijk a bati alarma riba e condicionnan di e ley, cual tin 28 punto estricto cu mester cumpli cune. Un di e puntonan mas precario ta cu si aki tres aña Aruba no logra baha su debe na 50%, e proceso ta cuminsa full di nobo.
Esaki, segun e parlamentario, ta nifica cu Aruba por keda mara structuralmente na control Hulandes y na e consehonan di CAft pa semper. “E firmamento di e Rijkswet HOFA ta nifica cu nos finansa ta stop di ta autonomo pa bira un asunto di Reino, bou control directo di Gobierno Hulandes,” Vrolijk a conclui, lamentando e impacto cu esaki lo tin riba e futuro soberania di nos isla y generacionnan.