Ministerio Publico a exigi awe den e caso penal ‘Quetzal’ un castigo di prison incondicional di 7
aña contra e dos sospechosonan Y.J.R. y E.J.D.S., cu ta wordo sospecha di a haci nan mes
culpable di trafico di persona of mensensmokkel den e periodo di 10 pa 11 di december 2023.
Como consecuencia di e mensensmokkel riba lama cuatro persona a bin na fayece. Nan curpa
sin bida a yega costa na Vader Piet.
E personanan aki tabata a bordo di un boto cu riba 10 di december 2023 a sali di Venezuela.
Investigacion a mustra cu tabatin 13 persona abordo, entre nan un mucha muher menor di
edad. Bao costa nort di Aruba un ola a lastra e boto, despues di cual esaki a bolter y e
personanan a bay awa. E.J.D.S. ta wordo acusa di tabata e capitan. Y.J.R. ta wordo acusa di a
organiza e mensensmokkel.
Hendenan cu ta bin Aruba di e manera aki y ilegalmente, ta hacie den speransa di logra un
mihor bida. Sinembargo, e viahe ta expone nan na peligronan hopi extremo. E botonan no ta
semper adecua pa cruza lama. Sa sucede cu lama ta hopi rough. Den e caso aki, e prijs cu e
personanan a paga pa e viahe tabata nan bida.