Dispensashon di e prohibishon pa tira vürwèrk durante kambio di aña

Pa medio di esaki gezaghèber di entidat públiko Boneiru ta anunsiá ku
relashoná ku kambio di aña, for di 31 di desèmber 2024 te ku 1 di yanüari 2025 e ta
duna dispensashon general di e prohibishon pa tira vürwèrk manera stipulá den artíkulo
31 sup b di e Ordenansa General di Polis (Algemene Politie Keur) di Boneiru. Pa tira
vürwèrk pafó di e periodo menshoná i pa tira vürwèrk ‘grandi’, manera pagara, ta rekerí un
pèrmit.
No tin mag di tira vürwèrk dentro di un rayo di 250 meter for di hòspital i institutonan di
kuido i edifisionan kaminda ta tene sirbishi di misa. No ta pèrmití tampoko pa tira vürwèrk
dentro di un rayo di 250 meter for di pòmp di gasolin i sitionan kaminda ta almasená
supstansianan eksplosivo i fásilmente inflamabel. Tiramentu di vürwèrk ku ta bai haltu no
tin mag di tuma lugá na un sitio ku por kousa peliger pa tráfiko aéreo.
No opstante e dispensashon general akí, tur hende ta keda responsabel pa eventual
leshon òf daño ku nan a okashoná na kualke persona, bestia òf bienes. Pa evitá daño i
desgrasia, gezaghèber ta hasi un yamada na tur hende pa tene kuenta ku e medidanan di
prekoushon i e koutela nesesario na momentu di tira vürwèrk. Manera mantené e
distansia nesesario na momentu di tira vürwèrk i tira vürwèrk solamente manera e
instrukshon di uso ta indiká i bou di ningun sirkunstansia no tira vürwèrk den direkshon di
hende òf bestia.