Imagina bo un cas caminda, mayor y yiu ta pleita cu otro, caminda palabra sushi, ta bay rond, caminda e mucha su bos ta bay halto, pa asina e tambe contesta insulto cu insulto, pasobra e mayor no ta dunando un ehempel di respet, ni tampoco por coregi su yiu.
E enemigo ta un mentiroso, pasobra e tipo di educacion ey, no ta esun mihor pa e mucha, pasobra ora un mucha no ta respeta, ni tampoco tende na cas, kico bo por spera di dje ora e ta riba caya.
Mal custumber ta bira ley, ora nos neglisha di pone orden y educa un mucha den caminda di Dios, for di chiki. Y ora e bira grandi nos por cosecha fruta di decencia.
Cu respet ta den decadencia, nos tur a ripara esey, e aumento di palabra malo den boca di hubentud, e bistimento for di ordo, e uso di droga y alcohol,e violencia, e malcomportacion y nan body language, ta identifica con cos ta na cas.
Ta parce manera tin mayor cu ta lubida, cu nan yiu ta nan identificacion, ora un hende mira con un mucha ta comporta, e ta refleha su mayornan, con nan ta anda cu otro.
Hopi biaha muchanan kier keda biba serca nan wela, pasobra serca wela tin cierto libertad y tolerancia, cu nan propio mayornan no ta permiti.
Pero tambe tin biaha ta e wela y e welo tin di interveni den e educacion di e nieto pa asina tur cos no bay perdi.
Un yiu no tin mester di bay for di cas, pa asina hende bisa cu e no a wordo lanta cu su mayornan, pero si mayor no ta atento, diabel ta horta bo yiu for di bo den cas hunto cu bo, pasobra bo no ta poniendo e atencion cu Dios ta demanda na bo yiu.
Ta importante pa bo mantene un mucha como mucha, y no envolvi e mucha den cos di hende grandi, bisando cu awendia e muchanan sa tur cos, mihor cu hende grandi, pero esey no ta berdad, pasobra un mucha cu no ta respeta, ta perde hopi oportunidad den su bida, y respet ta e pilar di educacion.
Sinja e mucha respeta su mes, pasobra hopi biaha muchanan ta hiba cierto nivel di combersacion, cu nan no tin edad pa sostene, ni tampoco educacion, pa sostene, nan ta hiba cierto actitud, cu no ta firme, y asina trece confusion den nan propio bida.
E enemigo ta loer constantemente, pasobra e a bin solamente, pa horta,pa mata y pa destrui.y su bista ta constantemente riba nos hubentud, pa wak con e por kibra nan careda hopi tempran.
Nos ta bibando den un tempo trabahoso, pero no usa esey como e motibo pa laga cosnan bay for di man, y bisa cu mundo ta bay caba, cu bo no ta compronde bo yiu, pero esforsa bo mes como mayor, pone atencion, y haci tur esfuerso pa bo yiu lanta un mucha cu respet.
Pasobra respet ta manera e sanger cu ta circula den nos curpa, una bes nos sanger no ta circula bon,nos tin problema cu henter nos curpa, asina ta ora comportacion di un mucha no ta bon y falta di respet pa su mes y otro hende ta wordo manifesta, e mucha ey lo trompica.
Respet ta keda respet y respet nunca lo bay for di moda serca hende drechi pasobra respet ta habri porta di bida.(Proverbionan 22:6).
Hoben no despresia e respet di bo mayor, pasobra esey lo ta bo carta di referencia mayan, cu Dios kier.