OM ta exigi castigo di prison pa homicidio di tanta

Corte den Prome Instancia a trata awe e caso penal contra e homber A.F. di 21 aña di edad, kende ta
wordo sospecha di asesinato y/of homicidio di su tanta.
A.F. ta wordo acusa di a kita bida di su tanta riba 2 di november 2025 den su cas na Solito dor di hinke
varios biaha cu cuchio.
Morto di e victima no a keda descubri te basta dia despues.
Riba 22 di november 2025, despues cu su doño di trabao a tuma contacto cu polis y a bisa cu e no a wak
e desde cuminsamento di november, polis a descubri e curpa den un freezer den un camber di cas.
Ya for di tempran den e investigacion A.F. a resulta como sospechoso.
A bin constata cu el a bandona Aruba y cu e tabata na Republica Dominicana desde 9 di november 2025.
Riba peticion di autoridadnan di Aruba, el a keda deteni pa polis Dominicano riba 20 di december 2025
na Santo Domingo.
Dia 8 di april 2026, Polis Dominicano a entreg’e na Aruba.
Fiscal a indica awe den Corte den Prome Instancia cu ta trata di un caso shocking cu a afecta comunidad
di Aruba profundamente.
Segun Ministerio Publico, por wordo comproba cu e sospechoso a kita bida di su tanta.
Sin embargo, no tin suficiente prueba pa yega na un condena di asesinato.
Aunke investigacion a mustra cu e sospechoso a haci diferente acto despues di morto di e victima pa
sconde su fayecimento, tin insuficiente indicacion cu el a actua cu premeditacion of tabatin di antemano
e plan pa mat’e.
Ora di formula e demanda di castigo, Ministerio Publico a considera e resultadonan di investigacionnan
psicologico y psiquiatrico di e sospechoso.
E investigacionnan aki a mustra cu e sospechoso ta verminderd toerekeningsvatbaar o sea cu su
capacidad pa compronde e consecuencianan di su accionnan ta limita.
Na mes momento, Ministerio Publico ta considera cu no obstante esey, A.F. tabata suficientemente
capas pa actua na un manera delibera dor di sconde e curpa di e victima, cobra su salario y entradanan
di huur, bende su auto y despues viaha pa Republica Dominicana.
Considerando e seriedad di e acusacionnan contra A.F., Ministerio Publico ta exigi un castigo di prison di
15 aña. Hues lo dicta sentencia riba 4 di december 2026.