Invitacion pa pueblo di Aruba atende un nochi di informacion
Heart-Centered Leadership Foundation (HCLF) ta invita hobennan adulto na Aruba pa crea
un impacto door di bira un boluntario cu e fundacion. Hobennan adulto riba 18 aña por yuda empodera y inspira hobennan na Aruba den diferente manera.
Boluntarionan di HCLF ta forma un parti esencial pa logra e proposito di e fundacion:
empodera hobennan pa ta mas sigur di nan mes, tin mas conocemento propio y claridad
riba ken nan ta, kico nan kier logra, y kico nan habilidadnan ta pa asina nan ta lidernan resiliente den comunidad. HCLF ta haci esaki door di ofrece diferente actividad y programa pa hoben.
Boluntarionan na HCLF por crea un impacto diferente manera. E boluntario por scoge di ta un lider di grupo durante actividadnan, unda e lo guia combersacionnan cu hobennan. Pa personanan interesa di duna sosten na un manera menos directo, HCLF ta ofrece rol tras di cortina. E rol lo por ta den forma di prepara materialnan, ofrece sosten durante diferente actividad, saca potret durante actividadnan y yuda den e proceso di prepara pa un actividad of ordena e espacio despues di actividadnan.
E boluntario ta wordo prepara cu tayernan, hermentnan y sosten continuo pa asina sinti sigur den su habilidadnan pa conecta y haci un impacto positivo cu hobennan. E beneficio di ta un boluntario no ta solamente pa crecemento personal y profesional, pero tambe lo yuda reinforsa e habilidadnan necesario den e mundo actual. Como parti di e grupo di boluntario, lo forma parti di un comunidad yena cu apoyo y hunto lo sigui crea impacto den bida di hobennan.
E impacto di e trabao di boluntarionan di HCLF por wordo refleha den e comentario cu hobennan ta duna. Un hoben ta comparti tocante e boluntarionan: “Nan ta scucha bo realmente”. Un otro hoben ta enfatisa cu e boluntario ta yuda crea un espacio unda nan tasinti sigur y no ta wordo husga: “Nan ta compronde sin huicio y por a relata cumi”. E testimonionan aki ta demostra HCLF su compromiso pa empodera e hubentud di Aruba.
Na HCLF un boluntario ta un ehempel y simbolo di speransa pa e hobennan. Ronan, un
boluntario desde 2019, ta remarka: “HCLF ta ofrece un ambiente habri unda bo por ta bo mes. Hunto, nos ta impacta e comunidad. Mi ta siña di hobennan y nan diferente
perspectivanan. Mi ta sinti un obligacion pa yuda hoben paso nan ta e futuro.
HCLF ta haci un yamada na tur hoben adulto y adulto di 18 aña bay ariba pa bin sera conoci un tiki mas di serca cu trabao boluntario cu e fundacion. HCLF ta organisando un nochi di informacion pa tur cu tin interes den bira un boluntario. Tur presente lo ricibi mas informacion riba kico HCLF su trabao ta ensera y con como boluntario por contribui na bienestar di hobennan.
E nochi di informacion lo tuma luga diadomingo dia 30 di Maart 2025 di 6:00 pm pa 7:30 pm na Teresita Center, San Nicolas. Tin cupo limita y mester confirma nan presencia door di manda un mensahe via Whatsapp na 5841211.
Boluntarionan tin e poder pa haci un impacto den bida di e hubentud di Aruba. Esaki ta e oportunidad pa crece y contribui na e desaroyo di e siguiente generacion. Tuma contacto cu HCLF via WhatsApp at 5841211 of email na hclfaruba@gmail.com pa confirma participation pa a nochi di informacion of pa ricibi mas informacion.
