Enseñansa pa Empleo desde 1988 ta percura pa cursonan pa recapcita nos hendenan. Cierre di Lago a trece hopi desafio pa nos pais y nos pueblo. Hopi hende a keda sin trabou. Hopi hende a bandona nos pais. Y esnan cu tabatin nan specialidad den refineria a haya nan mes diripente sin trabou y sin posibilidad pa un otro trabou. Adicionalmente, Aruba e tempo aya a cuminsa concentra mas den desaroyo hotelero y turistico pues un cambio total di ofishi. Pa e motibo aki cu na 1988 a lanta “Enseñansa pa Empleo” cu mester a percura pa recapacitacion di nos hendenan cu a perde trabou den refineria di LAGO.
Desde e tempo ey, hopi cos a cambia, EPE a cuminsa concentra pa recapacita tur persona cu tabata tin e interes pa re-educa, siña mas of crece mas den nan bida professional. Enseñansa pa Empleo tambe ta wordo yama cu cariño y orguyo ta door di pueblo, stakeholders y su staff “EPE”.
Temporada 2018 pa 2022:
Pa un temporada (2018-2022) EPE a cuminsa perde visibilidad den communidad, te ora cu na 2022 EPE a pasa over di e ministerio di Enseñansa pa e ministerio di Labor.
Ora a cuminsa reconstrui EPE durante 2022, sra. Sabine de Groot a tuma e reto pa bira “Kwartiermaker” pa EPE y pa pone EPE bek den e communidad cu a haya falta di Enseñansa pa Empleo su servicionan. A wordo dicidi cu EPE mester keda accesibel pa tur hende den communidad cu tin interes pa recapicita of siña mas y cu preisnan atractivo y pagabel pa tur hende.
Durante e aña 2022 no solamente mester pensa riba con por hiba EPE back den comunidad, pero sigur EPE mester a haya un “make-over” grandi. Klas-lokaalnan tabata tin mesa- y stoelnan di plastic cu no tabata apto pa usa pa participa den e cursonan. Hasta inscripcion y registracion tabata ser hasi manual mas tambe e edificio no tabata cla pa ricibi publico.
Remodelacion y digitalisacion pa hasi procesonan cana mas liher:
Durante un remodelacion basta largo cu a tuma lugar den 2022 y 2023 a sigui ofrece cursonan pa asina communidad por tende cu “Enseñansa pa Empleo” a bin (bek) pa keda.
Den e temporada ey, Enseñansa pa Empleo a haya su logo nobo, mas moderno, e edificio a wordo instala cu muebles nobo, ambos pa e klaslokaalnan y pa oficinanan; Klaslokaal chikito a wordo crea; henter edificio tin accesso na internet; inscripcion ta bai online via website y pa esun cu ta desea assistencia lo haya esei na na e bali nobo na unda e team di – customer care – ta cla pa sirbi nos pueblo.
EPE a bira un departamento gubernamental cu ta brinda SERVICIO cu e mayusculanan.
Era nobo di EPE:
Cu vision pa futuro, servicio den mente y enfoke pa e conecion cu mercado laboral sra. de Groot a guia Enseñansa pa Empleo di institucion cu a casi wordo elimina un institucion cu mas cu 1400 cursita pa aña, completamente “re-branded” y modernisa. Expansion den e cantidad di cursonan y tambe den e differente topiconan.
EPE y EPB ta uni pa duna cursonan na San Nicolas:
Na september 2024 un soño a bira realidad ora EPE a sera un acuerdo di cooperacion cu EPB San Nicolas y Enseñansa pa Empleo a logra trece cursonan enfoca riba sector technico na San Nicolas. E cursonan di e.o. welder, Handyman y electricista basico awo ta un realidad, cu un aprecio grandi di stakeholders cu a mira e necesidad grandi pa e 3 curso aki.
Fundacion y organisacionan a cuminsa participa:
Fuera di e cursistanan regular, EPE tambe ta yuda differente fundacionan local manera Sociale Vormingsprograma di Land Aruba y MSK SAV., “Muchila Creativo”, “Stichting Hunto” y Fundacion Grandi Hunto y hopi mas. Enseñansa pa Empleo ta yuda clientenan di e fundacionan cu entre otro cu les, cu localidad y hasta pone nan den contact cu otro stakeholders cual ta beneficia nan fundacion y nan clientenan.
EPE ta ofrece cursonan na pia di trabao:
Enseñansa pa Empleo no solamente ta duna les na e edifico na Playa (Engelandstraat 33) of na San Nicolas, pero tambe riba peticion di stakeholders den sector hotelero ta duna differente lesnan serca e stakeholder mes.
Maneho nobo cu dinamismo y vision:
Desde februari 2025 sra. Sabine de Groot a keda nombra Hoofd Coördinator di Enseñansa pa Empleo. E vision pa e futuro di EPE ta ensera mas cooperacion cu stakeholders pa desaroya cursonan nobo cu ta yena e necesidadnan riba mercado laboral, keda mehora y enfoka riba e calidad di cada curso y brinda mas cursistanan e oportunidad pa por haya un trabou despues di sigui curso na EPE.
Cursonan tin un duracion di entre 8 te cu 15 siman y ta enfoca riba e necesidad y demandanan di e mercado laboral.
Enseñansa pa Empleo su lema ta “Amplia bo conocemento y aumenta bo oportunidad”. EPE tey pa sirbi comunidad, lo keda accesisibel pa un y tur, y sin falta “Enseñansa pa Empleo” ta un partner fuerte pa e mercado laboral!
Bou di guia di Sabine de Groot, e team di EPE consisti di:
Julissa Kock (Customer Care), Jenny Lampe (Adminstratie), Francis Trimon (Horeca Coördinator) y Kayla Haakmeester (Algemeen Programma Coördinator) a traha duro cohunto pa logra yega na e meta pa rebrand, repositiona y forma e Enseñansa pa Empleo nobo.
Cu vision y determinacion e team dinamico aki ta cla sigui crece den futuro!