For di dia 28 di mei te ku 31 di yüni a tuma lugá e feria Agroalimentaira 2025 – e di nuebe edishon – na Santo Domingo. Dominican Fiesta Hotel & Convention Center tabata e sitio di e evento. E feria akí a keda organisá pa Junta Agroempresarial Dominicanan Inc. i Pro Dominicana. Un feria internashonal di kuminda, bebida i tabaku.
Boneiru a partisipá ku 18 empresario. E evento tabatin mas di 200 kumpradó interna- shonal for di 33 pais. Tabatin mas ku 2000 reunion di negoshi planiá ku 160 kompania dominikano di eksportashon. Esunnan ku a bishitá e feria por a eksperensiá un diversidat di produkto dominikano manera fruta tropikal (banana, bakoba, mango, piña, awakati), bèrdura di greenhouse òf bèrdura oriental, kòfi, kòkou, sigá, ròm, speserei i kuminda prosesá.
Kompanianan di CARICOM ku ta atendé ku prosesamentu di produkto agríkola i kompanianan agro-industrial tabatin e oportunidat pa ekshibí nan produktonan pa medio di Caribbean Export Development Agency den e stènt spesial yamá “Absolutely Caribbean Pavilion.”
Nos komersiantenan di Boneiru a haña informashon i konekshon riba hopi tereno manera: agrikultura i produktonan agríkola, prosesamentu i mashin di prosesamentu di produkto, material i mashin di empake pa produkto agríkola, mashin pa traha kuné den agrikultura, sertifikashon di prosesashon di produktonan di agrikultura.
Sektor di Konstrukshon
Den e delegashon di Boneiru tambe tabatin algun kompania di konstrukshon. Pa e grupo akí a tene reunionnan separá. E grupo a topa ku kompanianan di Santo Domingo ku ta sòru pa material di konstrukshon, blòki i blòki pa dekorashon, material pa instalashon, material pa instalashon di èrko i otro tiponan di mashin. Loke ta interesante ta ku sierto di e kompanianan aki ta traha ku standart oropeo, loke ta hasi importashon di nan produktonan i materialnan mas fásil. Aparte di reunion tabatin posibilidat pa bishita sierto kompanianan tambe pa wak e produktonan i materialnan ku nan ta entregá.
Sektor logístiko
Servisionan logístiko tambe ta un parti importante. Empake, yena kònteiner, traslado di kònteiner. Tur esakinan a bin na bùrt. Tabatin kompanianan di “forwarding” i agensia di un kompania di transporte di kònteiner konosí aki na Boneiru ku a duna presentashon.
E parti aki ta hopi importante pa e karga por yega Boneiru.
Tambe e delegashon di Boneiru tabata di bishita na e planta di kòkou CONACADO, kaminda nan a haña un splikashon di e proseso di transformashon di e bonchinan di kòkou den chukulati. Aki nos ke yama danki na Holland House Caribbean ku a organisá e bishita akí.
Un danki ta bai pa Kámara di Komersio Boneiru ku for di un inisio a duna su aporte pa gobièrnu por a prepará e mishon akí. Un danki spesial ta bai pa Ronnie Batista, vise kònsùl di Repúblika Dominicana na Kòrsou enkargá ku e.o. komersio regional, kende a asistí e delegashon di Boneiru i a yuda organisá reunion ku diferente kompania.
