Tourism Corporation Bonaire (TCB) den kolaborashon ku Bonaire Hotel and Tourism Association (BONHATA), Bonaire International Airport (BIA) i kapitan di haf di Entidat Públiko Boneiru, eksitosamente a organisá e promé ‘Bonaire Tourism Update’ di kada tres luna pa aña 2026 na Van der Valk Plaza Resort Bonaire.
E seshon di informashon konhunto a atraé mas ku 100 partisipante, inkluyendo partnernan importante for di e sektor, empresarionan lokal i miembronan di prensa. E asistensia grandi i partisipashon aktivo a destaká e interes grandi ku nos komunidat tin pa e prestashonnan i pa futuro di Boneiru su ekonomia.
Durante e presentashon, TCB i su partnernan a kompartí un kantidat grandi di dato, sifra di prestashon i konosementu stratégiko. E seshon a enfoká prinsipalmente riba sifranan resien di turismo, ku un splikashon detayá di prestashon di e sektornan na nos isla, pa loke ta trata estadia, turismo krusero i pasaheronan aéreo. TCB a duna tambe un bista general amplio di e inisiativanan di merkadeo, enbolbimentu di nos komunidat lokal, e inisiativanan di desaroyo di produkto i e aktividatnan promoshonal ku a keda ehekutá eksitosamente den e tres lunanan tras di lomba pa fiha atenshon di biaheronan riba Boneiru.
Banda di un bista bèk riba e prestashonnan di den pasado, durante e presentashon nan a duna tambe un bista padilanti pa loke ta trata sobrá di aña 2026. E presentadónan a ilustrá un imágen klarito di e pronóstikonan pa e aña akí i nan a pone énfasis riba e nesesidat urgente pa invertí den infrastruktura i diversifiká e oferta ekonómiko i turístiko di nos isla. E inisiativanan binidero akí ta intenshoná pa garantisá kresementu ekonómiko duradero, mehorá nos infrastruktura i balansá e fluhonan di bishitante.
“Nos ta kontentu ku e enbolbimentu fuerte di nos partnernan, mundu empresarial i prensa durante e seshon di ayera”, segun Elesiër Angel, direktor di TCB. “Durante e presentashon nos a tira lus riba e sifranan i datonan turístiko di e tres lunanan tras di lomba, nos a duna splikashon tokante e aktividatnan resien di merkadeo i desaroyo di produkto di TCB i nos a kompartí e pronóstikonan i e próksimo inisiativanan pa e aña akí. Nos ta orguyoso di por para akí nan komo partner, mirando ku e seshon akí no ta solamente un plataforma esensial pa kompartí informashon, pero ku e ta ofresé tambe un oportunidat ekselente pa trabou di ret i diskushonnan salú i adekuá. E kompromiso konhunto akí ta suprayá nos dedikashon pa manehá ekonomia i kresementu di Boneiru na un manera responsabel i sostenibel.”
E ‘briefing’ eksitoso a kombiná datonan esensial di e sektor di Veroesjka de Windt, direktor di BONHATA, ku a ilustrá e tendensianan aktual den hóreka i importansia di e sektor, Giordano Molina, direktor operashonal di BIA, ku a papia tokante e kresementu resien di e kantidat di pasahero na aeropuerto i tokante aktualisashonnan esensial tokante modernisashon di e infrastruktura, i Günther Flanegin, kapitan di haf, ku a presentá informashon importante tokante e tráfiko di pasahero krusero i tokante maneho di haf.
E interes grandi di parti di tantu nos mundu empresarial komo nos medionan di komunikashon, ta suprayá e kompromiso konhunto pa un futuro resiliente i próspero pa e ekosistema turístiko di Boneiru.
Pa mas informashon tokante datonan di e presentashon òf tokante próksimo inisiativanan, bo por tuma kontakto ku marketing@bonairisland.com.
