Corte Comun di Husticia ta establece Codigo di Alocacion di Caso

Directiva y Reunion di Tribunal di Corte Comun di Husticia a establece oficialmente e Codigo di Alocacion di Caso.
E codigo aki ta contene e puntonan di salida y directivanan pa alocacion di caso den Corte, y tin como meta transparencia, seguridad huridico y un distribucion di carga di trabao ekilibra entre e huesnan. E establecimento di e codigo aki ta subraya e intencion di Corte di crea un organisacion hudicial cuidadoso y transparente.
E meta di alocacion di caso, manera el a keda specifica den e Codigo di Alocacion di Caso, ta pa garantisa cu ta aloca caso na huesnan a base di criterionan obhetivo. Esaki ta contribui na imparcialidad, experticio y tratamento oportuno di casonan. A redacta e codigo pa cumpli cu rekisitonan internacional, incluyendo hurisprudencia di Corte Europeo di Derechonan Humano (Europees Hof voor de Rechten van de Mens – EHRM).
E puntonan principal di e codigo ta:
• Criterionan obhetivo:
Alocacion di caso mester ta basa riba criterionan cla y obhetivo, y no riba arbitrariedad of preferencia personal.
• Imparcialidad:
E procedura di alocacion mester garantisa cu huesnan ta imparcial y no tin conflictonan di interes na momento di trata e caso.
• Experticio:
Alocacion mester tene cuenta cu e experticio specifico di huesnan, pa asina casonan keda aloca na e hues mas adecua.
• Oportunidad:
Pa medio di e procedura di alocacion mester percura cu ta aloca casonan na un hues mas pronto posibel, pa asina fomenta un tratamento oportuno.
E Codigo di Alocacion di Caso ta intenciona como suplemento riba legislacion y regulacion existente cu ta garantisa e balornan central di poder hudicial, manera independencia, imparcialidad y integridad. Ta un instrumento importante pa fortalece confianza den hurisdiccion.
Desde awe por consulta e Codigo di Alocacion di Caso riba e website di Corte Comun di Husticia, a traves di e seccion Noticia / Publicacion / Codigo di Alocacion di Caso.