Despues di inverti miles di florin den:
Panja di marca,
Uniform cu no ta barata,
Keds di marca,
Tas di marca,
Buki specifico pa e anja escolar,
Map y schrift tur cos mester ta segun exigencia di e anja escolar, y Schoolgeld mester ta paga.
A yega e momento pa para keto un rato y trece tur cos den oracion dilanti di Dios.
Pasobra sin oracion nada no ta cana, pasobra hopi biaha hende ta kere cu ta nan placa, of nan conocemento ta move cos den nan bida, pero nada no ta move sin Dios, aunke nos no ta mir’E, Su man tey tur momento pa guia nos bida.
Tur mucha cu ta bay scol mester sinja prepara nan cosnan for di anochi y evita coremento mainta.
Tur mucha mester drumi anochi na tempo pa por lanta tempran mainta sin excuus.
Tur mucha mester ta na altura ki ora bus ta pasa, tur mucha mester sinja cohe bus, hasta si bo tin auto sinja bo yiu cohe bus.
Respet y decencia ta bini for di cas, esey mester ta un cadena invisibel na garganta di bo yiu, pasobra asina e ta identifica yiu di ken e ta, y ki sorto di educacion e ta hanja na cas.
Y ora nos ta uni pa haci oracion, nos ta hacie segun Bijbel ta indica nos, segun Cristo Hesus a bisa den su palabra Mateo 18:19:
Atrobe mi ta bisa boso, cu si riba tera,dos di boso bay di acuerdo tocante cualkier cos cu nan pidi, esaki ta wordo haci door di Mi Tata cu ta den cielo.
Pasobra caminda dos of tres reuni den mi nomber, ey mi ta ,meymey di nan.( Mateo 18:20).
Esaki ta palabra di Dios pa tur hende, pa tur cas, pa tur mayor cu tin yiu ta bay scol, pa nan uni cu nan yiu na cas, y haci oracion, pa tur cos bay bon cu e yiu na scol, si bo yiu pa un of otro motibo, no por ta hunto cu bo yame na telefon, y hasi oracion cune, pasobra esey ta deber di tur mayor.
Especialmente tur tata, mester haci oracion cu nan yiunan, pasobra ta nan Dios a pone como cabes di cas y e esposa mester tey como ayudante, pa asina Dios mira e union den e cas, y e interes di e mayornan pa nan yiu bay dilanti.
Sabiendo tur e tropieso cu tin na caminda pa scol, durante scol y despues di scol, ta tempo pa busca ayudo di Dios, pasobra nos ta biba den tempo trabahoso, un caminda scuridad y mal influencia kier domina tur caminda.
Palabra di Dios ta recorda nos cu nos lucha no ta contra carni y sanger, pesey nos mester dedica tempo personalmente na nos yiunan, pasobra bo presencia como mayor ta duna e mucha curashi, ta demostra seriedad, y ta demostra amor pa bo yiu.
E palabra di Dios y oracion ta masha importante, pa bida di nos yiunan,tur dia y tur momento, ningun articulo digital no por proteha bo yiu contra tentacion y malicia di diabel, solamente oracion y palabra di Dios, por sinja bo yiu para firme, y confia den Senjor.
Pero no solamente, awor cu scol ta bay cuminsa, mester tin oracion, pero e oracion aki mester continua tur momento, pe bira un custumber den bida di e mucha, y pa e mucha realisa cu e mester comunica cu Dios, pa tur cos bay bon den su bida.
Pega na Dios nos por tur cos, leu for di Dios nos no por nada.