BONHATA (Bonaire Hotel and Tourism Association) ta ekspresá su profundo desapunto relashoná ku e echo ku Boneiru entrante 3 di yanüari 2026 ta bai pèrdè e ruta di JetBlue entre New York (JFK) i Boneiru.
For di luna di sèptèmber 2024 repetidamente BONHATA a pidi atenshon pa e situashon vulnerabel rònt di e ruta akí i a bini ku diferente posibilidat komo solushon pa evitá e senario akí. No opstante hopi karta, reunion, atvertensia, momentu di konsulta i promesa, tòg awe nos ta pará akínan:
mas ku 4,4 mion dòler di garantia a bai pèrdí,
sinku vuelo pa siman ménos for di Nortamérika den e ‘high season’ binidero i,
daño di reputashon konsiderabel pa Boneiru den mundu di aviashon i komo partner konfiabel di destinashon pa kompanianan di aviashon.
No opstante señalnan, echonan i atvertensianan evidente, gobièrnu a keda sin tuma e pasonan nesesario pa mantené e ruta. E resultado ta ku Boneiru no solamente ta pèrdè un konekshon aéreo importante ku Merka, pero tambe un oportunidat pa kresementu duradero, empleo i visibilidat internashonal.
E pèrdida di e ruta di JetBlue ta suprayá e nesesidat pa profeshonalisá e toma di desishon turístiko i ankra esaki den un vishon pa término largu. Kada dòler invertí for di turismo tin e potensial pa generá múltiple rendimentu pa Boneiru su ekonomia mas amplio – basta ku hasi uso di esaki na un manera efisiente i efektivo.
BONHATA ta sigui komprometé su mes pa solushonnan transparente ku enfoke riba futuro, i pa kolaborashon struktural pa rekuperá konfiansa di partnernan internashonal i hasi e konekshonnan aéreo, e merkadeo i e desaroyo ekonómiko di Boneiru resiliente pa futuro.