Mike Eman ta nenga di contesta preguntanan pa loke ta HOFA
Den sala di parlamento despues di 2 siman atrobe nos a continua cu e reunion publico cu a cuminsa dia 28 di augustus 2025 y a keda geschorst pa AVP por bay analisa e concepto di ley, cu a continua 2 luna despues dia 28 di oktober y keda geschorst pa Minister Gerlien Croes por a bay Hulanda pa 2 dia bin bek y dos siman despues dia 10 di november 2025 porfin nos por continua y finalisa un reunion asina importante pa nos pais. Lastimamente nan ta atende cu e ley mescos cu nan ta atende cu e reunion. Ningun importancia, ningun prioridad y sigur ningun urgencia. Anto cu un asunto asina esencial pa futuro di nos pais gobierno ta keda sin contesta preguntanan y duna informacion necesario.
Como parlamentario mi a keda hopi decepciona con Prome Minister (PM) Mike Eman ta atende cu parlamento. Den mi di dos tanda mi a inicia bisando Presidente di Parlamento di esaki. Mi tabata hopi decepciona pasobra cu despues cu mi a haci PM Mike Eman solamente 4 pregunta den 1ra tanda dia 28 di oktober, cu mi a ripitinan den vraagpunt awe dia 10 di november 2025 y djei den un punto di ordo un rato despues y asina mes PM Mike Eman no tin e decencia pa contesta esakinan. Presidente di Parlamento, sr Sneek, ta accepta e situacion aki sin mas y no ta haci un esfuerso pa pidi PM pa contesta esakinan. Esaki sigur ta un situacion cu mi no kier pa continua y mi a urgi Presidente di Parlamento pa trece mehoracion den esaki.
E Consensus Rijkswet HOFA, ta mas cu un simpel ley. E ta un ley cu ta mina nos autonomia financiero aun mas y e derecho di autodeterminacion pa loke ta trata e futuro di nos pais. Pesey mi a haci preguntanan simpel y a cuestiona e proceso encamina pa PM y a pidi’e aclaracion. Lastimamente mi no a haya contesta of reaccion. Aki bou mi ta comparti esakinan cu pueblo.
Dia 4 di juli 2025 PM Eman a indica cu a base di e concepto cu a logra yega na dje op ambtelijk niveau, nan ta bay den bestuurlijk overleg cu Gobierno di Hulanda, caminda nan ta bay delibera riba locual tin riba mesa y a indica cu cosnan por cambia. El a informa tambe cu door cu Gobierno di Hulanda a cay, nan a indica na e Staatssecretaris nobo, cu nan lo desea di sigui cu e overleg na augustus y cu despues di esaki Gobierno lo bini pa busca gevoelens di Staten ariba e concepto manera cu e ta e ora ey riba mesa prome cu entrege. Pero realidad tabata otro y pesey mi a haci e pregunta na PM Eman TA KICO A BAY ROBES?
Con a para cu e palabracion cu el a haci cu Parlamento cu nos por tin tur trankilidad cu Gobierno no ta bay haci nada cu compromisonan pa Aruba sin cu Parlamento di Aruba a wordo scucha y sin cu Parlamento di Aruba finalmente a duna su aprobacion of su desaprobacion. Mi a pidi PM Mike Eman pa splica Parlamento y pueblo pakico y ki ora a dicidi cu no ta importante mas pa Parlamento wordo scucha prome cu bay di acuerdo manera claramente e la enfatisa e importancia di esaki durante e reunion di dia 4 di juli 2025? Mi tabata kier sa tambe di PM Eman tambe ki dia e bestuurlijk overleg a inicia, con largo e la dura, y kennan a participa na esaki pa Aruba?
Pasobra nos mester ta consciente cu si mester kere e informacion cu PM Eman a duna Parlamento, nos por conclui cu den 13 dia, esta di 1 pa 13 di augustus, Gobierno AVP-Futuro a dicidi pa bay di acuerdo. Ta ki negosacion esaki tabata? Un falta di seriedad totaal.
Otro pregunta cu mi a haci PM ta pa e splica pueblo dicon el a tuma representantenan di pueblo haci? Anto no MEP y PPA so, pero nan propio parlamentarionan. Mi a puntre dicon el a gaña parlamento y no tabatin e curashi pa anuncia nan decision di aprobacion di e contenido di consensus RW HOFA mientras nan tabatin tur oportunidad pa haci esaki na mas cu un ocacion prome cu e reunion di dia 28 di augustus 2025 pasobra nos tabatin 4 reunion publico y 1 besloten bijeenkomst entre 21 y 27 di augustus caminda nos a haci pregunta riba e RW Hofa. Un situacion condenabel y inacceptabel.
Pa conclui pueblo mester realisa cu ainda gobierno no tin concensus di Parlamento, AVP despues di mas cu 2 luna ainda no por fiha un posicion y Mike de Meza a bisa bon cla cu e no ta para pa RW Hofa. Gobierno tabata sa cu nan no tin sosten den parlamento y pesey no a cumpli cu nan deber di consulta cu nos, cual tambe ta condenabel y inacceptabel.
Press release: MEP