TCB ta informá
Tourism Corporation Bonaire (TCB) a kompartí informashon turístiko preliminario pa luna di november 2025, for di kua ta resultá ku Boneiru a risibí 16.752 bishitante stayover. Esaki ta un oumento di 2,8% kompará ku luna di novèmber 2024, ora ku 16.302 bishitante a yega nos isla.
E bishitantenan for di Hulanda a forma e grupo di mas grandi, representando 46,3% di e kantidat total di bishitante (7761). E bishitantenan for di Merka tabata e di dos grupo mas grandi, esta 27,1% di e kantidat total di 4541 bishitante.
En total 1901 bishitante (11,3%) for di Kòrsou a bishitá nos isla, siguí pa Alemania ku 381 bishitante (2,3%), Canada ku 342 bishitante (2%), Bélgika ku 246 bishitante (1,5%), Aruba ku 231 bishitante (1,4%), Colombia ku 149 bishitante (0,9%), Suisa ku 147 bishitante (0,9%), Brasil ku 105 bishitante (0,6%) i Reino Uní ku 69 bishitante (0,4%).
Mayoria di e bishitantenan for di Merka a biaha ku un partner, siguí pa esunnan ku a biaha nan so. Mayoria a bini pa vakansi (45,5%), sambuyamentu (42,2%) i pa bishitá amigu i famia (2,3%). Mayoria di nan a hospedá den un hotèl (53%), un vila (13,2%), un apartamento (7,9%), nan propio bibienda (6,6%) òf serka un miembro di famia (3,8%). E bishitantenan for di Merka a bini prinsipalmente for di New York, Florida, Texas, California i North Carolina. For di e repartishon di edat ta resultá ku e biaheronan di 55 pa 64 aña a representá 25,2% di e bishitantenan, miéntras e biaheronan di 65 aña bai ariba a representá 20,7% di e kantidat total di bishitante.
Mayoria di e bishitantenan for di Hulanda tabata personanan ku a biaha nan so, siguí pa esunnan ku a biaha huntu ku un partner. Mayoria bishitante a bini pa vakansi (67,2%), pa bishitá amigu i famia (10,7%) i pa negoshi (8,3%). Mayoria di e bishitantenan a hospedá den un hotèl (47,4%), siguí pa un apartamento (16,5%), serka un miembro di famia (9,8%), den un vila (7%) i den nan propio bibienda (5,4%). Mayoria di e bishitantenan hulandes a bini for di Noord-Holland, Zuid-Holland, Noord-Brabant, Gelderland i Utrecht, kaminda e grupo di edat di 55 pa 64 aña (25,9%) i e grupo di edat di 45 pa 54 aña (17,8%) a forma e segmentonan di mas grandi.
Pa mas informashon tokante Boneiru su prestashonnan turístiko, bo por bishitá www.bonaireisland.com òf bo por tuma kontakto ku nos via info@bonaireisland.com.
