E empresario Irani-Americano Hushang Ansary a fayece diadomingo ultimo na edat di 98 aña. Ansary tabata durante hopi aña e accionista mayoritario di e compaña di seguro Ennia y propietario di e resort Mullet Bay na Sint Maarten.
Bou di maneho di Ansary, durante varios aña a tuma luga mal maneho financiero serio na Ennia. E compaña di seguro a wordo afecta di capital y a haci inversionnan iresponsabel, loke a sali na cla den e ultimo añanan.
E Banco Central di Corsou y Sint Maarten a interveni na Ennia na aña 2018. Tres aña despues, na 2021, e corte a conclui cu e accionnan di Ansary a causa dañonan financiero cu ta suma di hopi placa.
Awe ainda no ta cla kico e fayecimento di Ansary lo nifica pa e proceso legal cu tabata keda pendiente contra dje. Na momento di su morto, e procedimentonan huridico ainda tabata den curso.