Parlamentario Rocco Tjon ta expresa su gran satisfaccion pa e trabou dinamico di Stichting HUNTO den su esfuerso pa brinda cuido y apoyo na adictonan ambulante. Segun Tjon, e iniciativa ta un muestra cla cu Aruba ta tumando liderato den e area di asistencia social y recuperacion di adictonan.
“Mi ta hopi orguyoso di Stichting HUNTO y e trabou cu nan ta haci,” a declara Parlamentario Tjon.
E trailer di Stichting HUNTO ta parti di un plan integral cu ta enfoca riba yuda adictonan riba caya. Segun Tjon, e trailer no solamente ta trece informacion, sino tambe ta inspira adictonan pa reconoce e posibilidad nan pa cambia nan bida.
E iniciativa ta motiva adictonan pa busca rehabilitacion den centro, duna nan speransa pa un bida mas saludabel, y haci nan sinti cu nan no ta solo den e proceso di recuperacion.
“E forma aki di acercamento ta duna adictonan un experiencia real di e bida cu nan por logra, mientras nan ta sinti sosten y motivacion,” a agrega Tjon.
Cu e proyecto aki, Stichting HUNTO ta reafirma su compromiso pa ser un lider den asistencia y reintegracion social na Aruba.
