Ex-Lid di Tweede kamer Raoul White a trece dilanti un preocupacion profundo over di e diferencia den nivel educativo entre e islanan den Caribe Hulandes y e parti europeo di Reino. White ta cuestiona e tardansa den inversionnan cu mester garantisa un igualdad educativo pa tur mucha den Reino, sin importa na unda nan a nace.
White a señala cu e brecha den calidad di enseñansa ta un situacion cu ta persisti pa añanan largo. Segun e ex-parlamentario, e situacion aki ta alarmante y mester di atencion inmediato di e mandatarionan na Hulanda.
Accion legislativo y inversion
Pa duna forsa na su preocupacion, White a presenta oficialmente un mocion dirigi na e Ministerio y e Secretaria di Estado pa Relacionnan den Reino, como tambe na e Ministerio di Enseñansa, Cultura y Ciencia (OCW). Den e documento aki, e ta pidi claridad riba e motibo pakico inversionnan concreto pa logra igualdad den enseñansa ta tumando asina hopi tempo pa materialisa. E mocion tin algun tempo caba pero ta kere cu e mester haya e atencion debido.
Base debil ta afecta futuro
Un di e puntonan mas relevante di su argumento ta e enfoke riba enseñansa primario. White ta considera cu si e base no ta bon, esaki tin un efecto negativo den cadena pa e futuro generacion.
“Si e enseñansa primario ta deficiente, esaki ta afecta directamente e perspectivanan pa futuro y e desaroyo di talento di nos muchanan ora nan mester sigui pa MBO of enseñansa superior,” White a splica. Pa e politico, e fundeshi di e sistema mester ta solido pa por garantisa exito den e pasonan siguiente di e studiante.
Falta di recurso y personal
E ex-parlamentario a comparti cu e ta ricibi señalnan cla for di e sector mes, indicando cu e nivel di e docentenan y e disponibilidad di materialnan educativo manera buki y material di lesamento no ta na e nivel rekeri. E falta di recurso aki ta pone un peso adicional riba e sistema escolar di e islanan.
Un vision nobo pa Reino
Mirando padilanti, White ta propone pa no keda pega den e metodonan bieu, sino pa busca un forma nobo di organisa enseñansa. Su vision ta pa combina e miho experiencianan di pasado cu e necesidadnan actual di e islanan, creando asina un sistema educativo mas fuerte y uniform den henter Reino Hulandes.
Esaki, segun White, ta e unico manera pa percura cu e talentonan den Caribe Hulandes wordo cultiva debidamente y cu e muchanan tin e mesun oportunidadnan cu nan parnan na Europa.