Lider di fraccion di AVP, Jennifer Reyes, a duna un splicacion amplio riba e motibo pakico a yama Minister di Enseñansa na Parlamento pa un Reunion Publico (OV). E punto di discordia ta e destahonan publico pa material didactico na Papiamento y Hulandes, caminda tin duda riba e proceduranan cu a wordo sigui.
Segun Reyes, e reunion a wordo pidi despues cu un articulo a sali na luz den media, indicando cu e sumanan pa e materialnan aki a surpasa e limite permiti pa ley sin un destaho publico habri. Den e caso aki, e Minister lo a pidi un excepcion pa otorga e trabounan na companianan of personanan específico.
Buscando aclaracion y transparencia
Pa fraccion di AVP, ta fundamental pa e mandatario duna un contesta detaya riba con e proceso aki a cana. “Pa nos transparency ta importante, pero tambe e parti di progreso y continuacion,” Reyes a declara. El a splica cu oposicion a scoge pa un Reunion Publico pa asina e Minister por ta na su luga pa brinda tur e aclaracionnan necesario na e representantenan di pueblo.
Reyes a nota cu e tipo di excepcionnan aki a yega di sosode den pasado caba, y cu e por ta debi na e “specialidad” di e materia. “No tur hende, riba e parti di Papiamento, lo por haci trabounan asina specialisa,” el a admiti, anticipando cu esaki por ta un di e argumentonan di e Minister.
Calidad y continuidad den enseñansa
Un punto clave cu Reyes a trece dilanti ta e importancia di no interumpi e proceso educativo. El a enfatisa cu den enseñansa bo no por simplemente para un proyecto y cuminsa full di nobo si kier mantene un nivel halto di material y calidad.
“Ora bo ta den e parti di enseñansa, e lo ta bon pa continua cu e mesun nivel di material y calidad,” e lider di fraccion a agrega.
En espera di contesta
Apesar cu otro topiconan tambe a wordo discuti durante e jornada parlamentario, pa e fraccion di AVP e prioridad ta keda e transparencia den e uzo di fondonan publico pa material di scol. Jennifer Reyes a conclui indicando cu nan ta keda en espera di e contesta y aclaracionnan final di e Minister pa determina si e procesonan a wordo ehecuta conforme e reglanan di bon gobernacion.