Den marco di e reunionnan di IPCO (Interparlementair Koninkrijksoverleg) cu ta tumando luga actualmente, señor Paul Comenencia, miembro di Raad van State a comparti su opinion y preocupacionnan tocante e tema di cooperacion den Reino Hulandes. Segun Comenencia, maske tur delegacion ta duna balor na cooperacion, tin un falta di claridad riba e meta y direccion cu e paisnan kier hiba hunto.
Durante e reunion, e topico di cooperacion a resalta hopi. Comenencia a splica cu for di e diferente delegacionnan por a nota un sentimento mixto. Di un banda, nan ta reconoce cu cooperacion entre e cuater paisnan (Aruba, Corsou, Sint Maarten y Hulanda) ta crucial pa e progreso, bienestar di e pueblo y stabilidad di Reino. Pero di otro banda, hopi a expresa cu nan ta sinti falta di atencion riba diferente aspecto y falta di un miho implementacion di e cooperacion aki.
Ora a puntra señor Comenencia tocante e enfoke di cooperacion specialmente e critica cu cooperacion hopi biaha ta keda na palabra so pero no ta wordo implementa debidamente , el a duna un contesta miho splica:
Pa bo por coopera, ta importante pa e paisnan tin un bon entendimento tocante kico ta e metanan cu hunto nan kier logra. Pa kico bo kier coopera? Kico bo kier logra?” Comenencia a enfatisa.
Pa e motibo aki, e miembro di Raad van State a sugeri durante su intervencion pa e cuater paisnan traha hunto riba un vision comparti. E vision aki mester defini claramente unda Reino kier yega awor y den futuro, mescos cu a haci na aña 1954 ora a establece e Statuut.
E tempo ey, e principio tabata basa riba e idea cu e paisnan ta haci mas tanto posibel pa nan mes, pero nan ta sostene otro caminda ta necesario.
Comenencia a splica cu awor, mas cu 70 aña despues, e desaroyonan na cada pais a cambia. P’esei, e ta kere cu esaki ta e momento ideal pa e cuater paisnan, evalua con nan kier sigui cu otro y kico cooperacion ta nifica den e epoca actual.
Tin diferente interpretacion tocante con ta coopera den Reino y kico ta importante. Pa aclaria esaki y yega na un cooperacion berdadero y productivo, lo ta bon pa e cuater paisnan duna bida na un lista nobo mescos cu a haci na 1954, e di dicon nos ta hunto y con nos ta sigui hunto,” el a duna di conoce.
Riba e pregunta si e paisnan di Reino realmente ta sostene otro den momentonan dificil (manera tabata e caso den e crisis di e pandemia di COVID-19) of si tin e tendencia di structuralmente duna otronan un coreccion, Comenencia a indica cu esaki ta un pregunta cu e gobiernonan y parlamentonan mes mester contesta. E ta considera cu cada pais mes mester evalua con satisfecho e ta cu e manera cu un a compara cu e otro den momento di crisis.