e prome Dia di Canon a tuma luga na Fontein. E tabata un bunita dia cu mas di 250 bishitante. E dia aki a forma e evento di apertura oficial di e Canon di Bonaire. E Canon di Bonaire ta un liña di tempo moderno cu ta duna un bista general di personanan, sitionan, artefactonan y sucesonan special y importante for di e historia di Bonaire. Despues, e Canon lo ta disponibel via un website.
E meta di e Canon ta pa comparti e historia di Bonaire na un manera simpel y accesibel. Mester por usa e Canon den enseñansa tambe. Cada topico den e Canon nos ta yama un ‘bentana’. Hunto cu cada bentana ta bini un texto cortico cu informacion adicional, manera buki, potret, video y podcast tocante e topico. E Canon ta mustra nos con pasado, presente y futuro ta conecta cu otro.
Pa e motibo aki, a scohe Fontein como e sitio pa e prome Dia di Canon di Bonaire. Antes, Fontein tabata importante pa e poblacion indigena, y awe e tin un nificacion special ainda pa Bonaire. Nos ta traha e Canon hunto cu expertonan local y e comunidad. Durante e Dia di Canon, bishitantenan por a propone topico pa e Canon. Hopi hende a haci uso di esaki y a scirbi nan ideanan riba e borchi di Canon.
Dentro di poco, nos lo pone e proposicionnan aki riba e website di Entidad Publico Bonaire. Despues, e comunidad por vota pa e topiconan cu nan ta haya mas importante pa e prome 30 bentananan di e Canon. Na fin di aña 2028, nos lo publica e prome bentananan aki.
Den futuro, por añadi bentana nobo na e Canon. Tambe ta posible pa adapta bentananan existente ora cu investigacion nobo produci informacion nobo, of ora cu cualkier suceso importante tuma luga cu merece un luga den e Canon. E Canon ta sigui desaroya su mes, pues. Historia nunca no ta para keto y ta sigui crece cu storianan y conocemento nobo. Di e manera aki, e storia di Bonaire ta keda conserva pa e siguiente generacionnan.
Durante e Dia di Canon, nos a organisa diferente actividad cultural-historico tambe. Pa esaki, cordialmente nos kier gradici nos partnernan di colaboracion: FuHiKuBo pa e recoridonan cultural-historico, Adelina Piard y Alex Plantijn (Mangazina di Rei) pa e taller di yerba medicinal, Ghislaine Monte pa e taller di pigmento natural, y Dorian Crespo Gómez pa e taller di traha habon di klei.
Bo mes tin feedback tocante e Dia di Canon? Of bo kier yuda scirbi e Canon of organisa actividad cultural y historico? E ora ey, manda un email na daudi.cijntje@bonairegov.com. Entidad Publico Bonaire ta coordina e proyecto aki, cu ta forma parti di e Agenda di Accion Pasado di Sclavitud Bonaire.
