despues di a scucha exigencia di Fiscal di 13 aña di prison pa Israel Paesch, abogado mr. Arendsz Marchena a hiba defensa y ta haya cu su cliente Israel a actua den defensa propio.
Por a compronde cu abogado mr. Arendsz Marchena ta haya cu door di e menazanan y maltratonan pa añanan largo, Israel tabata den hopi angustia y a tira su primo Rene Paesch mata, ora Rene a menace di lo mat’e.
TIRA DEN DEFENSA PROPIO
Mr. Arendsz Marchena a bisa Hues cu ta duel Israel Paesch (40) masha hopi cu e morto di Rene y tambe e famia. E abogado ta haya cu Israel no ta culpabel, el a actua den defensa propio y no ta responsabel pa su actonan.
Na opinion di mr. Arendsz Marchena, e caso di 23 Augustus 2025 tabata e culminacion di e terrorisacion, causa angustia y menaza di Rene riba Israel. E abogado a mustra cu un testigo a declara cu e conflicto a cuminsa 8 aña pasa. E cos a escala ora Rene a kima e boto di Israel. Otro testigo a bisa cu Israel a wordo maltrata na un restaurant. Tin otro testigo a bisa cu algun luna promer, Israel a wordo maltrata y cu Israel mester a bay hospital pa tratamento. Tin mas testigo cu ta bisa cu Rene tabata bay na cas di Israel y causa problema y menaza.
ACUSADO A WORDO MALTRATA SEVERO
E abogado a mustra cu dia 23 Augustus 2025, e defunto Rene a maltrata Israel severo pafor di Lekker Bar. Tambe cu Israel tabata teme cu Rene lo bay tir’e mata.
E abogado a bisa Hues cu Fiscal a interpreta e expresion di Rene riba Israel robez. El a mustra cu Fiscal a interpreta e expresion “mata mi no” como “no mata mi”. E abogado a bisa Hues cu e expresion di Rene tabata reta Israel pa tir’e.
ISRAEL NO TABATA POR A SOPORTA MAS
Abogado a bisa cu Israel a tira Rene door di angustia. Despues Israel a bringa cu Rene te ora Rene no tabata move mas. Na opinion di abogado, esaki tabata producto di e angustia cu Israel tabata aden y no tabata por a soporta mas.
E abogado a bisa cu Rene a bay na cas di Israel pa regla cuenta cu Israel. Na opinion di abogado, Israel tabata panico den situacion pa sobrevivi di Rene, kende a expresa cu lo bay mat’e. E abogado a mustra cu Psycologo y Psychiater a mustra cu Israel tabata menos responsabel pa su actonan. E abogado ta haya cu e hecho cu Rene a bisa Israel cu e lo bay mat’e a haci cu Israel a actua den defensa propio. El a mustra cu pa añanan largo, Rene tabata pasa dilanti cas di Israel y caso panico. Na opinion di abogado, Israel a tira sin sa cuanto tiro el a los. Tur esakinan ta mustra cu Israel tabata den un situacion di bida of morto y den su angusta a tira den defensa propio. Abogado ta haya cu Israel no por a haci nada otro door di e angustia cu e tabata aden causa door di Rene.
El a mustra cu pa 8 aña largo, Rene tabata menaza y teroriza Israel. Abogado a bisa Hues cu tin tres situacion cu ta mustra cu Israel a actua den defensa propio y tabata menos responsabel pa su actonan. Segun abogado, Israel ta para responsabel pa tabatin un arma y no ta responsabel pa e droga cu a haya den e apartamento na su cas. Abogado ta haya cu Hues mester declara demanda di daño no admisibel pasobra no a hustifica e dañonan suficiente.
Hues, despues di a scucha e reaccion di Fiscal y abogado, a bisa cu 10 Juli 2026 e lo bay dicta sentencia.