Gobierno ta reconoce legado di famia Werleman y nan contribucion na cultura y comunidad di Aruba
Diamars atardi, Prome Minister Mike Eman a coloca oficialmente e seyo di monumento protehi riba un cas tipico Arubano na Alto Vista 12. Cu e acto aki, e cas ta bira parti oficial di e patrimonio historico di Aruba y lo keda conserva pa e generacionnan den futuro.
E ceremonia a reuni diferente miembro di famia Werman, representando varios generacion cu a crece, biba y forma parti di e historia di e cas. Durante su discurso, Prome Minister Eman a destaca cu e reconocemento no ta solamente pa e edificio, sino tambe pa e legado humano, cultural y comunitario cu e cas ta representa.
Mas cu un cas
Segun Prome Minister Eman, e cas na Alto Vista 12 ta simbolisa e balornan importante manera perseverancia, determinacion, sentido di famia y compromiso cu comunidad.
Eman a enfatisa cu, hunto cu e cas, Aruba ta conserva tambe e historia di un famia cu a laga un marca profundo den comunidad. Atencion special tambe a wordo dedica na Antonio “Toni” Werman y su esposa, kende durante nan bida a contribui significativamente na cultura, musica y desaroyo social di Aruba.
Segun e Prome Minister, Toni Werman tabata conoci como un persona semper dispuesto pa yuda otro, cu un actitud positivo y cu un dedicacion constante pa haci Aruba un luga miho. Su amor pa su famia, su comunidad y su pais a haci cu hopi persona ainda awe ta corda riba dje cu aprecio y respet.
Legado den cultura y comunidad
Durante e ceremonia a resalta tambe e rol importante cu Toni Werman a hunga den promociona musica Arubano y den preservacion di identidad cultural. Su liderazgo, compromiso y amor pa su comunidad a laga un impacto cu ainda ta sinti awe dia.
Pa e Prome Minister, e historia di famia Werman ta un ehempel di con esfuerso, trabou duro y dedicacion, un famia humilde por contribui significativamente na progreso di comunidad y pais. E legado cu a wordo traspasa di generacion pa generacion ta forma parti di e historia di Alto Vista y di Aruba mes.
Responsabilidad comparti
Cu e colocacion di e seyo oficial, e cas ta haya un reconocemento special como monumento protehi. E reconocemento aki ta bin cu un responsabilidad comparti pa conserva, cuida y preserva e patrimonio pa futuro.
Gobierno a expresa su agradecimento na Monumentenbureau Aruba, na famia Werman y na tur esnan cu a contribui pa haci posible e proteccion oficial di e cas.
Mas monumentonan pa Aruba
E instalacion di e seyo na Alto Vista 12 ta forma parti di un esfuerso mas amplio pa fortalece e proteccion di patrimonio historico di Aruba. Durante e mesun atardi, Prome Minister Mike Eman tambe a coloca un seyo di monumento protegi riba un otro cas historico na Alto Vista 69.
Siman pasa, e seyo oficial a wordo instala riba Kapel Emanuel na San Nicolas, cu recientemente a haya e status di monumento protegi. E accionnan aki ta forma parti di un programa continuo pa identifica, reconoce y preserva edificionan y luganan cu tin un balor special pa historia, cultura y identidad di Aruba.
Mas cas, edificio y otro patrimonio cu tin importancia historico lo ricibi e reconocemento aki den futuro. Asina, Gobierno impulsa pa Prome Minister Mike Eman ta sigui traha pa conserva e herencia cultural di nos pueblo y pa sigura cu e historia di nos isla keda preserva pa e generacionnan cu ta bin. E cas na Alto Vista 12 lo sigui conta e historia di un famia, di un bario y di Aruba mes, sirbiendo como un simbolo di e balornan, perseverancia y compromiso cu a yuda forma nos pais.
