Departamento di Salubridad Publico (DVG) a reacciona publicamente. Vocero di e departamento, Jurette Croes, a informa cu DVG a lansa un seccion special dedica na calamidad riba nan website oficial.
E iniciativa aki tin como meta principal pa educa y prepara e comunidad di Aruba pa temponan di crisis. Segun Croes, e meta ta pa duna informacion continuo y crucial riba kico un ciudadano mester haci prome, durante y despues di un situacion di calamidad.
Diferente tipo di calamidad y crisis
E seccion nobo riba e plataforma digital ta cubri un variedad amplio di escenario di crisis. Entre otro, e comunidad por haya instruccionnan cla riba kico pa haci den caso di:
Horcan y Tsunami
Temblor
Desaster of fayo den cas
Situacionnan di crisis den cooperacion cu Centro di Alerta y Maneho di Crisis (CMO)
Vocero di DVG Jurette Croes a enfatisa e importancia di ta debidamente informa. El a splica cu e experiencia ora un situacion di crisis surgi de pronto, e falta di informacion por hiba na panico, temor y confusion generalisa.
“Ora un persona of un famia no sa kico pa haci, bo ta haya situacionnan caotico caminda hende ta drenta den panico of tin hopi pregunta sin contesta. Esey por hiba na decisionnan cu no ta responsabel pa e situacion e momento ey,” Croes a duna di conoce.
Preparacion y e “Emergency Kit”
Un di e partinan mas importante di e seccion nobo aki ta e checklist pa un Emergency Kit (cover di emergencia). DVG ta conseha tur hogar pa tin un tas of cover prepara cu articulonan esencial cu bo por gara y bay cune rapidamente.
E cover di emergencia aki mester inclui:
Remedi: Suficiente provision di remedi pa tur miembro di famia.
Documentonan importante: Registro medico, paspoort y carnet di ID (AZV/Censo).
Equipo medico special: Pa personanan cu ta depende di aparato medico electrico, mester tin un plan alternativo structural pa ora coriente bay.
DVG ta invita henter e comunidad di Aruba pa bishita e website oficial www.dvg.aw, busca e seccion di calamidad, y tuma nota di e informacionnan aki pa asina tur cas ta miho prepara pa cualkier eventualidad.