Temblor ta nifica poder di Dios, temblor ta nifica juicio di Dios, pero tambe Hesus a papia di temblor, pest y gera como senjal di Su binida.
Den un temblor poder di Dios ta manifesta, locual un temblor por haci den algun seconde. Arma of Bom traha pa man di hende ta keda chikito.
Temblor ta poder di naturalesa y poder di naturalesa ta poder di Dios, for di principio di mundo Dios a demostra Su poder cu temblor, pasobra ta solamente Dios por pone tera tembla.
Ta solamente poder di Dios por pone tera habri, y traga hende y edificio, y mas cu tur cos e temblor no ta avisa manera mal tempo y orkaan por avisa.
Mescos cu temblor ta yega sin avisa, asina e binida di nos Senjor Hesus Cristo lo ta, pasobra ningun hende no sa e dia ni e ora cu e lo bini.
Hesus a avisa cu lo tin cosnan cu ta bay sosode, cosnan cu pa hopi tempo ta sosodiendo caba, cu ta mustra hopi cla den e binida di nos Senjor.
Pero mescos cu den tempo di Noe of Sodoma y Gommora en bes di hende hala serca Dios, nan ta rechasa, chercha, y hasta pretende cu ciencia y materialismo sa mas cu Dios.
Manera e palabra ta bisa den 2 Timoteo 3 :1-5 con karakter di hende lo cambia den e ultimo tempo aki, cual nos tur ta mira cu ta tempo trabahoso nos ta bibando aden, pasobra hopi hende enbes di arepenti, nan ta compremete mas cu e mundo.
Senjor a laga aviso serio pa tur esnan cu ta kere den Dios, pa corda nos tur locual 1 Corintionan 6:19-20 ta bisa: Of boso no sa cu boso curpa ta e tempel di Spirito Santo. Kende ta den boso,Kende boso tin di Dios y cu boso no ta pertenece na boso mes.Pasobra boso a wordo cumpra pa un preis, pesey glorifica Dios den boso curpa.
Ta parce manera hopi hende no ta tende, ni mira, ni scucha e versiculonan aki, pero nan ta papia cla locual Dios a pone den nos, y con nos tin cu biba cu Dios,pasobra ta un gran previlegio ora e Spirito Santo di Dios ta den nos. Pesey e enemigo ta odia nos, pa e contacto directo cu nos ta hanja cu Dios ora nos entrega nos bida na Cristo Hesus y kere den dje manera e palabra ta bisa den Romanonan 10:9-10-11).
For di den principio di mundo temblor ta wordo husa door di Dios, pa demostra cu Dios ta rabia ora hende ta rebeldia contra Dios, ora hende ta constantemente den Idolatria, Bruheria y Inhusticia, pasobra e cosnan ey ta lanta furia di Dios y destruccion ta tuma lugar.
Y si nos wak bon no tin ningun parti di mundo cu temblor no por tuma lugar, pasobra e poder di naturalesa y e furia y advertencia di Dios ta yega tur caminda.
Den Jeremias 10:10 ta para scirbi: Ma Senjor ta e Dios berdadero, E ta Dios bibo y Rey eterno.
Ora cu E rabia, tera ta tembla, y e nacionnan no por soporta su indignacion.
Awendia hende ta usa hopi protocol pa keda bon cu otro, y no bisa e berdad manera Juan Bautista a bisa Herodes, pero Dios den su inmenso poder ta demostra su Furia, y Su advertencia na henter mundo.
Hesus ta bisa den Mateo 24:7-8 cu esaki lo ta principio di dolor di parto, esey ta nifica cu ainda falta.
Mateo 24:13 ta bisa; Ma esun cu perservera te na fin , esey lo ta salba.
Sinceramente, Pastor Marcel Balootje.