Fraccion di MAN-PIN den Parlamento a presenta un peticion na Minister di Ensenansa, Ciencia, Cultura i Deporte pa otorga un Crus di Merito na miembronan di e seleccion di futbol di Corsou cu a representa nan pais na Mundial di Futbol 2026. Segun Fraccion di MAN-PIN, e seleccion a duna un contribucion excepcional, historico, di orguyo nacional i union cu a duna hopi balor na e imagen di Corsou.
Fraccion di MAN-PIN ta indica cu, basa riba documentonan legal manera ‘Eilandsverordening Kruis van Verdienste’ (Decreto Insular di Crus di Merito) i tambe e ‘Reglement van het Kruis van Verdienste’ (Reglamento di Crus di Merito), no tin ningun exclusion pa candidatonan cu no ta residente di Corsou por ricibi un Crus di Merito.
Exigencianan manera di residencia na Corsou i edad minimo di 50 aña cu ta figura riba e website oficial ta maneho di gobierno, no ley. Esey ta nifica cu den e caso excepcional aki, Minister por expande su maneho i otorga e distincion di nan pais na e seleccion.
Fraccion di MAN-PIN ta pidi minister pa laga su departamento compila e datonan necesario pa presenta e miembronan di e seleccion como candidato na Comision di Crus di Merito.
Den caso cu minister kier sigui cu e maneho actual i dicidi pa no otorga e Crus di Merito na e seleccion, Fraccion di MAN-PIN ta propone como alternativa, pa otorga un ‘Placa Oficial di Merito’.
Fraccion ta spera pronto un contesta positivo di minister.