Despues di a bolbe di exterior, awe mainta Leoncita Arends a bay KIA pa cumpli cu e sentencia di Corte Superior den caso Avestruz.
Por a compronde cu tabatin palabracion cu Ministerio Publico cu e luna aki Leoncita ta bolbe di exterior y lo cumpli cu e sentencia.
Manera ta conoci, 12 Juli 2024, Hof (tres Hues) di Corte Superior, a dicta sentencia den e caso Avestruz, caminda 4 sospechoso, Werleman, Nuñez, Mansur y Harms a wordo declara liber, mientras cu P.Sussebeek, L.Arends y B.Sevinger a wordo condena.
Hof a bisa cu Sussebeek a cumpra Sevinger pa haya terenonan. Hof ta haya esaki un asunto serio. Hof a tene cuenta cu e caso ta bieu y cu Sussebeek tabata den mal publicidad. Hof a condena Sussebeek na 30 luna (2 aña y 6 luna di prison) di cual 10 luna ta condicional cu un tempo di prueba di 3 aña. Hof a dicidi cu e 1.3 miyon dollar lo keda confisca.
Hof ta haya Sevinger culpable di malversacion y a laga su mes wordo cumpra. Hof a mustra cu e fundacion di Sevinger a haya placanan y Sevinger a malversa placa di e fundacion.
Pa cu e castigo, Hof a bisa cu mester manda señal bon cla cu corupcion no ta acceptable y tin castigo pisa pa esaki. Hof ta haya cu Sevinger a abusa di su posecion como minister.
Hof a condena Sevinger na 4 aña di prison, di cual 1 aña ta condicional cu 3 aña di prueba. Tambe Hof a prohibi Sevinger pa 5 aña e no por participa como politico den eleccion.
Hof ta haya cu Arends a cumpra Sevinger pa tereno. Hof ta haya proba cu Arends a manda placa den envelop pa Sevinger. Hof a mustra riba declaracion di e testigo Roga cu a hiba e placa y a papia cu ta festia tin di tereno. Hof a bisa cu nan no ta kere Arends cu e envelop tabatin ticketnan di loteria. Hof a mustra cu Arends a keda desmenti di a manda Roga cu envelop te na momento cu e señora di Sevinger a declara cu Roga a hiba un envelop p’e.
Hof a condena Arends na 2 aña di prison di cual 1 aña ta condicional cu 3 aña di prueba. Hof a bisa cu e no ta mira necesidad di pone un multa manera PG a exigi.
Mientras cu B. Sevinger y P. Sussebeek ariba indicacion di Ministerio Publico, mester a bay KIA pa sinta nan castigo, L. Arends tabata den exterior. Tabatin palabracion cu e luna aki e mester ta na Aruba pa asina bay KIA. Awe mainta Leoncita a presenta na KIA.
