Awe Gobierno kier sa kico Parlamento ta pensa y kier su opinion. Pero unda e interes pa opinion di Parlamento tabata, ora Gobierno a permiti un excepcion riba e mesun Ley di Normering Topinkomens pa director di Aruba Airport Authority? Cu e pregunta ey, parlamentario di PPA, Eduard Pieters, a confronta Gobierno durante un reunion publico caminda Minister Wever a pidi “gevoelens” di Parlamento pa revision di Landsverordening Normering Topinkomens (LNT). Pa Pieters, e peticion pa conoce e “gevoelens” di Parlamento no por ta mira separa for di loke Gobierno ya a haci anteriormente.
Un excepcion cu Gobierno ya a duna
E punto di Pieters tin un antecedente concreto. Dia 6 di november 2025, Gobierno a autorisa un excepcion bou articulo 12 di LNT, permitiendo Aruba Airport Authority y Schiphol International acorda un remuneracion di Afl. 1.089.396 pa e CEO presenta door di Schiphol International. E Landsbesluit ta menciona, entre otro; continuidad operacional, experiencia esencial, stabilidad di gerencia y posicion internacional di aeropuerto como e motibonan pa e excepcion.
Pero precisamente aki Pieters ta pone enfasis riba e contradiccion politico. Segun Pieters, Gobierno no a bin Parlamento prome pa puntra si e representantenan di pueblo tabata di acuerdo cu haci e excepcion ey. “E tempo ey Minister y Gobierno AVP-FUTURO a bin Parlamento prome cu nan a firma? No, señor Presidente! Pues pakico opinion di Parlamento diripiente ta importante pa Gobierno?” Pieters a expresa.
Pieters: Gobierno a dobla pa Schiphol
Pieters a bay mas leu y a presenta un acusacion politico fuerte: segun Pieters, e excepcion no tabata simplemente un decision administrativo, sino resultado di presion di Royal Schiphol Group. E Landsbesluit mes ta confirma cu e relacion strategico entre AAA y Royal Schiphol Group, existente desde 2004, tabata un elemento central den decision di Gobierno. E documento tambe ta indica, cu Schiphol ta propone e personanan pa direccion general di AAA. Sinembargo ta parce cu ta Schiphol a dicidi pa gobierno.
Pieters, sinembargo, ta interpreta e resultado politicamente diferente: “Gobierno a dobla pa e interesnan di Schiphol Group.” Segun e parlamentario, Gobierno mester a para firme riba su propio ley y defende oportunidad pa e profesionalnan local, en bes di acomoda presion externo.
Y kico Aruba a haya bek?
Pieters despues a lansa e pregunta, cu ta cambia e debate di salario pa resultado: Kico Aruba a haya bek pa e excepcion? E ta referi na e situacion actual rond aeropuerto como argumento: falta di suficiente parkeerplaats, dificultad cu fluho di auto y pasahero y un impresion general di falta di planificacion logistico.
Pieters a cuestiona con esaki ta cuadra cu argumento di “experiencia esencial” cu Gobierno a uza pa hustifica e excepcion salarial. “Unda e return on investment ta?” Un edificio renoba cu a costa Aruba miyones no ta suficiente, si experiencia di usuario na su entrada y salida ta keda caracterisa pa un desorden.
No ta trata solamente LNT
E debate di awe oficialmente ta, pa Parlamento expresa su gevoelens tocante revision di LNT. Pero pa PPA, Gobierno no por trata opinion di Parlamento como algo cu ta importante, solamente ora e ta conveniente. Si Parlamento su opinion tin balor awe, e pregunta di Pieters ta simpel: “Pakico e no tabatin e mesun balor, ora Gobierno a haci un excepcion di mas cu un miyon florin pa CEO di aeropuerto? Respet pa Parlamento no por ta selectivo. Nos mester tuma nos trabou como parlamentario na serio. Esaki ta un organo respeta y nos mester duna nos mes e respet ey.” Pieters a expresa.
Pa PPA, Gobierno no por pidi Parlamento su gevoelens awe, mientras a tuma e decisionnan grandi di ayera, sin e mesun consideracion. Pasobra Parlamento no ta un instrumento pa legitima decision despues. Parlamento ta e organo cu Gobierno mester respeta, prome cu tuma decision.