Den e dianan venidero Ministerio Publico lo saca e citacionnan den e caso Kwihi. Corte a determina mientrastanto un fecha pa e caso regie.
Den e caso aki tin seis sospechoso, entre nan C.V.J.R., ex-minister di Transporte, Communicacion y Sector Primario. E sospechonan ta relaciona cu apropiacion indebido di fondonan publico, estafa, labamento di placa, fraude di belasting y maluso di funcion, cometi entre november 2017 y oktober 2021. Publico a haya sa di caso Kwihi pa prome biaha na februari 2023, ora a tene huiszoeking na diferente adres y a confisca cargadonan di informacion y administracion. Ministerio Publico a informa e tempo ey cu e investigacion tabata dirigi entre otro, contra e ex-minister.
Codigo di Procedemento Penal ta bisa cu pa Ministerio Publico por persigui un mandatario sospecha di a comete un delito den ehercisio di su funcion, Corte Comun mester autorisa Ministerio Publico prome. E garantia aki ta fiha den articulo 476 di Codigo di Procedemento Penal, cu a drenta na vigor na april 2024. E legislador kier a preveni/evita cu e disposicion (bepaling) ey cu ley penal por wordo usa como un posibel instrumento di poder politico.
Riba 25 di augustus ultimo Corte Comun a trata e peticion di Ministerio Publico conforme articulo 476 di Codigo di Procedemento Penal pa por persigui e ex-minister. Corte Comun a aproba e peticion aki, dor di cual Ministerio Publico ta autorisa pa sigui cu persecucion.