Despues di mas cu 1.165 dia di trabou di defensa di derechonan di e pueblo Boneriano na nivel internacional sostení riba tereno internacional, James Finies recientemente a reuni cu Gezaghebber di Boneiro, John Soliano, marcando un momento importante den e trayecto internacional realisa pa presenta e caso di Boneiro dilanti di Nacionnan Uni y e comunidad internacional rond mundo.
Hunto cu Presidente di BHRO, Davika Bissessar-Shaw, Sr. Finies a hiba e caso di Boneiro hopi mas leu cu e isla, hibando e caso y e bos di e pueblo Boneriano den e comunidad internacional y den e sistema di Nacionnan Uni, den Latinoamerica, Centroamerica, Caribe y mas aleu.
Durante e trayecto internacional aki, nan a dialoga cu Presidentenan, Prome Ministronan, lidernan di gobierno, diplomaticonan, organisacionnan regional y internacional y representantenan di Estadonan Miembro di Nacionnan Uni, buscando atencion internacional pa e caso di Boneiro y su derecho di autodeterminacion.
E campaña tambe a logra sosten regional importante, cu ta urgiendo pa tuma accion cu Asamblea General di Nacionnan Uni y cu Estadonan Miembro di Nacionnan Uni, cu mira riba e reinscripcion di Boneiro riba e lista di Nacionnan Uni di Teritorionan Sin Propio Gobernacion.
E esfuerso internacional a yega na e punto y plataforma di mas halto di mundo na Juni 2026, ora cu formalmente a presenta un proyecto di resolucion tocante Boneiro den e proceso di e di 80 sesion di Asamblea General di Nacionnan Uni. E iniciativa ta atende e status di Boneiro y e obligacionnan di Reino Hulandes bou di Articulo 73 di Carta di Nacionnan Uni.
Durante e reunion, Finies a presenta documentacion na Gezaghebber Soliano relaciona cu e trayecto internacional aki di e trabou pa defende derechonan di e pueblo Boneriano.
Finies a scohe awor pa trese cas bek e experiencia adkiri y e relacionnan internacional construi durante e trayecto aki y pa sigui cu su trabou den arena politico di Boneiro. E experiencia, conocemento y red internacional ey ta forma awor parti di e forsa di su partido politico, y lo usa esakinan pa defende dignidad, derechonan y interesnan di e pueblo y pa yuda construi un futuro mas justo.
E trabou di derechonan humano y defensa internacional di BHRO ta sigui bou di liderazgo di su Presidenta, Davika Bissessar-Shaw.