Relaciona cu e incidente cu tiramento den e fin di siman tras di lomba, gezaghebber John Soliano ta dirigi su mes na comunidad cu e siguiente mensahe:
“Loke a pasa e fin di siman aki mester preocupa nos tur. No solamente pasobra a usa un arma di candela contra propiedad di un agente policial, loke ta un crimen castigabel, sino pasobra e reaccionnan despues ta mustra un tendencia cu nos no por ignora: tin hende ta hustifica y asta aplaudi menasa, intimidacion y violencia.
KPCN a duna un mensahe cla: no ta tolera violencia y intimidacion contra agente policial. Como gezaghebber mi ta sostene e mensahe aki. Nos agentenan y tur hende cu ta traha pa siguridad y orden publico mester por haci nan trabou sin intimidacion. Na momento cu esnan cu ta traha pa siguridad y orden publico ta bou di menasa, nos estado di derecho ta bou di menasa.
Pero e principio aki ta bay mas leu. Violencia no ta aceptabel contra polis, contra ambtenaar, ni contra ningun otro hende den nos comunidad.
Nos por tin desacuerdo. Nos por ta rabia. Nos por ta critico. Esei ta parti di un comunidad caminda hende tin libertad pa expresa nan mes. Pero rabia no ta un excusa pa menasa. Desacuerdo no ta un hustificacion pa agresion. Y violencia no por bira nos manera di reacciona riba otro.
Loke ta preocupa mi particularmente ta ora nos cuminsa mira violencia na un manera diferente, depende di ken e victima ta. Ora nos bagatelisa, hustifica of asta aplaudi violencia pasobra nos no ta di acuerdo cu e persona riba ken e violencia ta dirigi, nos ta normalisa algo cu bou di ningun circunstancia lo no por ta normal. Mi ta haci un apelacion riba nos lidernan den e comunidad aki pa sali y condena e menasa y agresion cu ta tumando luga den nos comunidad y especialmente riba medionan social.
Nos tin cu puntra nos mes: esaki ta e Boneiro caminda nos kier biba? Esaki ta e Boneiro cu nos kier laga pa nos yiu/yiunan?
Mi ta haci un yamada na nos comunidad: laga nos pensa prome cu nos reacciona, scucha prome cu nos husga y sigui mira e ser humano den otro. Ningun hende mester biba cu miedo pa violencia. Cambio ta cuminsa cu nos mes.”
Gezaghebber John Soliano