E “Bonaire Ambassador Program” di Tourism Corporation Bonaire (TCB) ta sigui krese, sigur serka nos bishitantenan. Esaki por a mira un biaha mas den luna di sèptèmber na momentu ku a rekonosé ocho wéspet mas komo embahador di Boneiru.
Entre e ocho bishitantenan akí tin algun tambe ku pa promé biaha a risibí e rekonosementu akí.
Den kategoria di bròns nos a honra David Lawrence for di Merka ku ta bishitá Boneiru pa 10 aña. Nos a puntra David kiko ta hasi Boneiru asina spesial p’e i su kontesta tabata: ‘E sitionan bunita pa sambuyá ku e isla akí ta ofresé i e amigunan ku mi a sera konosí kuné durante e 10 añanan ku mi ta bishitando Boneiru.”
Fred i Denise Starner ta bishitando Boneiru pa 16 aña i a keda agradabelmente sorprendí ku nan rekonosementu na Van der Valk Plaza Resort. Pa e okashon akí nos a otorgá nan un feneta di plata.
Martin i Jenniffer Turley tambe a keda honrá pa nan di 23 aña bishitando nos isla. Na e okashon akí nan a risibí un feneta di oro for di man di sra. Valerie Trinidad di Habitat Bonaire.
E grupo di sambuyadó “Eels on Wheels” ta bishitá Boneiru tur aña. Algun di nan miembronan tambe a risibí rekonosementu. Ta trata akí di Tamara Koleng ku ta bishitando Boneiru pa 11 aña, Jill Crocker 25 aña i Tammie Shelton 26 aña. Nos a otorgá nan feneta di bròns i oro korespondiente na e kantidat di aña ku nan ta bishitando nos isla.
