Directora di Cas di Cultura, sra. Vicky Arens, a presenta e trabou di Cas di Cultura en conexion cu e
tema di nos herencia colonial y a presenta un futuro proyecto cu lo yuda crea mas concientisacion
riba Aruba su pasado colonial y e rol di Cas di Cultura den forma nos propio identidad.
Dia 23 di september e proyecto “REPAIR: Siña Husticia Cultural for di Islanan ABC” a yega su
culminacion, despues di un aña di dialogo y preparacion cu partnernan di Aruba, Boneiro, Corsow y
Hulanda. E proyecto a wordo dirigi pa academiconan di Universidad di Utrecht, Sra. Camila Malig y
Sra. Jamila Mascat, cual a duna espacio pa papia tocante e impacto duradero di herencia colonial
riba herencia cultural actual. A explora con intervencionnan reparativo desaroya na e Islanan ABC, cu
formatonan diferente, por informa y forma un ehempel den debatenan mas amplio riba practicanan
di herencia, husticia cultural y reparacion. Partnernan den e proyecto tabata Vicky Arens pa Cas di
Cultura Aruba, Emma Louise Prat pa Fundashon Históriko Kultural Boneriano, Zhwendeline Pieter
di Association of Museums & Heritage of Curaçao y Leenke Ripmeester di Eye Filmmuseum di
Hulanda. (Fuente https://dutchcaribbeanculturaljustice.my.canva.site)
Cu un reunion interactivo bibo y online, interesadonan y representantenan di various gremio
cultural, social-cultural y educativo, a dialoga tocante kico ta e necesidadnan, den e sentido di
organisacion of den un systema di comunicacion, pa crea un futuro cu mas comprencion y igualdad
como ciudadanonan den Reino. Esaki a tuma lugar na e Eye Collection Center di e museo di cine Eye
na Amsterdam.
E dia prome, na Pakhuis de Zwijger, publico interesa y profesionalnan a scucha presentacionnan
tocante ehempelnan di husticia cultural door di e partnernar di proyecto. Tambe tabata tin un foro
pa discucion y dialogo y a mustra cinenan procedente di islanan ABC, incluyendo e documentario
Memoria Ancestral, traha pa Natusha Croes cu un gran ekipo di participante, den nomber di Cas di
Cultura.
Sra. Arens a culmina su presentacion cu e proyecto cu a nace di Memoria Ancestral, cual ta un
exhibicion permanente cu lo wordo traha conhunto cu e renobacion di Cas di Cultura. E exhibicion lo
trata e besindario di Mon Plaisir, e establecemento di “Het Cultureel Centrum” na 1958, y e
decadanan despues cu e instituto y actornan den e veld cultural a traha caminda pa Cas di Cultura
haya su identidad Arubiano. E exhibicion aki lo forma un punto mas riba e mapa di e historia di nos
pais.
Vicky Arens a presenta na e simposio “REPAIR. Learning Cultural Justice from the ABC Islands” na Hulanda
