Sint Maarten ta yama bonbini e siman aki na artistanan di henter Caribe Hulandes pa e lansamento di Creative Kingdom Lab, un iniciativa di Lemonade, den colaboracion cu Jerry Gumbs, miho conoci como e rapper y artista Juni Martina. E iniciativa aki ta reuni artistanan y pensadonan creativo di tur e islanan pa explora con arte, cultura y colaboracion creativo por inspira perspectivanan nobo riba democracia, identidad y futuro di Reino Hulandes.
Despues di un tayer online tocante relacionnan den Reino na comienso di e siman aki, e artistanan participante ta yegando Sint Maarten pa sigui cu intercambio creativo y pa e prome Creative Kingdom Lab, cu ta tuma luga diasabra 14 di november na Axum Art Café na Philipsburg.
Dia 17 di november lo tuma luga na Sint Maarten e Kingdom Summit (Cumbre di Reino), organisa pa e gobiernonan di Aruba, Corsou, Sint Maarten y Hulanda. Nan lo combersa tocante cooperacion, respet mutuo y futuro di Reino. E iniciadonan di e Lab ta kere cu e temanan aki no ta solamente politico of huridico. Nan ta experencianan biba y cultural, pasobra nan ta forma e manera con hende ta experiencia identidad, idioma, movilidad, reconocemento, poder y e sentido di pertenece, tur dia, riba cada isla. Sinembargo, masha poco biaha artistanan y comunidadnan ta forma parti di e combersacion ey.
Pesey, e proyecto piloto aki ta reuni ganadonan di e Where Culture Lives Artist Prize y artistanan di Sint Maarten pa un dia di intercambio creativo y experimentacion colectivo. Construyendo riba e conexionnan y e conocemento genera pa medio di e investigacion reciente di mapeo cultural Where Culture Lives den e seis islanan Caribense, e Lab ta busca pa crea espacio pa bosnan nobo, ideanan y perspectivanan artistico riba retonan social comparti.
Jorien Wuite, iniciado di Creative Kingdom Lab y fundado di Lemonade: “Nos kier trece diferente bos y perspectiva den e combersacionnan tocante Reino Hulandes. Arte y cultura ta duna nos e libertad pa cuestiona structuranan existente, desafia suposicionnan y imagina posibilidadnan nobo pa colaboracion.”
E preparacionnan pa e Lab ta andando caba. Na comienso di e siman aki, e artistanan participante a uni na un tayer online tocante relacionnan den Reino, democracia, historia y colaboracion, cu contribucion di facilitadonan incluyendo Lisette Delgado. Segun cu e artistanan bishitante ta yega Sint Maarten, e programa ta continua diabierna cu un tayer cu ta explora desaroyo sostenibel, cambio climatico y comunidadnan insular resiliente, conectando perspectivanan artistico cu arquitectura y diseño.
E preguntanan central di CKL ta: Con nos por biba, traha y crea algo bunita hunto, como un solo Caribe y como un solo Reino? Y practica creativo por yuda nos imagina, y practica, democracia di un otro manera? Ta enfatisa cu no tin un solo contesta corecto. Ta pidi e artistanan pa ta critico, diferente, contradictorio, yen di speransa of incomodo. Tur perspectiva ta bonbini, incluyendo duda tocante Reino mes.
E diasabra aki, e artistanan lo traha colectivamente pa transforma nan reflexionnan den ideanan creativo y obranan den proceso (works in progress) na Axum Art Café. E Lab tin como meta pa conclui cu un momento di intercambio pa studiantenan cu aspiracion artistico na Axum Art Café, creando oportunidad pa mas dialogo y colaboracion.
Jerry Gumbs, co-iniciado di Creative Kingdom Lab: “Arte ta permiti nos explora preguntanan cu no semper tin contesta directo. Door di trece artistanan di diferente isla y disciplina hunto, nos kier crea espacio pa perspectivanan inespera, conexionnan nobo y imaginacion colectivo. Creative Kingdom Lab no ta trata di dicta resultado, sino di descubri kico ta bira posibel ora nos crea hunto.”
Inicia pa medio di Lemonade, Creative Kingdom Lab ta refleha su compromiso pa cultiva comunidadnan creativo y desaroya plataformanan nobo pa intercambio cultural, inovacion y colaboracion. E proyecto piloto aki ta bira posibel danki na e subsidio di Fonds voor Cultuurparticipatie, cu apoyo di produccion local di Menelik Arnell (Kizzy) y Axum Art Café como e luga anfitrion.