Den cuadro di Dia Internacional di Derecho di Mucha riba 20 di november, ATHA ta presenta su proyecto “Tienda di Derecho di Mucha”. E iniciativa aki tin como meta principal pa haci e contenido di e Tratado di Derecho di Mucha mas comprendibel, accesibel y aplicabel den bida diario pa mucha, hoben, mayor y institucionnan na Aruba.
Segun Franchesca Heinze director di ATHA, den practica actual por mira cu hopi biaha personanan cu tin un necesidad no ta acerca instancianan mesora manera antes. P’esey, e organisacion ta enfatisa e importancia pa instancianan social y educativo ta mas presente den comunidad riba un manera creativo y menos formal, logrando asina un miho conexion cu e grupo meta.
Guia, triage y empoderamento sin kita autoridad di mayor
Tienda di Derecho di Mucha ta fungi tambe como punto di recepcion pa Comision Nacional Derecho di Mucha. Ora un mucha, hoben of mayor acerca ATHA porehempel den caso di bullying of duda tocante un derecho e proceso ta cuminsa cu un triage. Den e fase aki ta evalua si e situacion ta cay bou di ATHA of si un otro instancia, manera Bureau Sociale Zaken, ta mas adecua pa brinda ayudo. Si e caso ta pa ATHA, ta sigui cu un intake, dialogo y coaching practico pa empodera e hoben pa e por para pa su mes.
ATHA ta subraya cu e guia aki ta tuma luga den balansa y nunca ta kita e autoridad ni e responsabilidad legal di mayor of adulto. Como ehempel ta menciona e derecho di privacidad (cu ta vigente te cu 17 aña, prome cu e hoben bira mayor di edad na 18 aña): un mucha tin derecho riba privacidad, pero esey no ta nifica cu un mayor no por drenta su camber of acerca su yiu ora tin preocupacion, ya cu e mayor ta keda legalmente responsabel. E formacion rond di e balansa aki ta un parti esencial di loke Tienda di Derecho di Mucha ta ofrece na tanto mayor como hoben. Ademas, ATHA ta duna conseho y sosten na organisacion y compania pa incorpora e aspecto di derecho di mucha den nan maneho.
Mascotanan y material educativo pa kleuter y scol basico
Aunke hopi hende a yega di tende di derecho di mucha, e contenido real di e tratado ainda ta relativamente desconoci pa hopi mayor y mucha. Pasobra e acercamento pa mucha chikito ta diferente cu esun pa hoben, ATHA a crea un grupo di mascota pa hiba e mensahe di formacion y respet na nivel di kleuter y scol basico:
Leo: E lider di tur e mascotanan, cu lo ta presente den e Heroes Parade riba Dia di Mucha y lo bishita varios scol pa prome biaha.
Choco: Ta representa e tema di educacion.
Ace: Un tortuga den rolstoel cu ta simbolisa tanto salud como personanan cu limitacion.
Mila: Un pelicano cu ta forma parti di e team pa conscientisa e muchanan.
Por medio di musica, stripverhalen (cuenta den plachi), plachi di pinta y lesbrieven pa sostene docente den klas, ATHA ta educa e muchanan no solamente riba nan derecho, sino tambe riba con pa expresa nan mes cu respet y na un manera corecto.
Proyecto piloto rumbo pa 2027
E lansamento rond di 20 di november ta marca e inicio di un proyecto piloto cu lo sigui desaroya durante aña 2027, unda lo introduci mas material educativo den scol, institucion y comunidad. Instancianan, organisacionnan of mayor cu ta desea pa mascota Leo bishita un evento of actividad pa duna mas conscientisacion, como tambe esnan cu ta busca mas informacion riba Tienda di Derecho di Mucha y otro proyectonan, por tuma contacto cu ATHA via nan pagina oficial di Facebook: Associatie Trabou di Hubentut na Aruba (ATHA).
