Featured General Aruba Turismo

A.t.a ta lansa ‘la felicidad extendida’ na latinoamerica


Dia 20 di maart ta celebra internacionalmente e ‘Dia di Felicidad’ y pa medio di un campaña specifico pa e mercado di Latino America, Aruba Tourism Authority a tuma e oportunidad pa celebra esaki durante e luna aki cu e campaña yama “La Felicidad Extendida”.

 

E promocion pa cu esaki a inicia dia 8 di maart y lo sigui pa full e luna te cu 31 di maart. E programa ta duna diferente beneficio na e diferente segmento, manera pareha, grupo di amigo y tambe famia.

 

Cu participacion di diferente socio manera AHATA, aerolinea, operadornan di tour, actividadnan entre otro, A.T.A. por a realisa e campaña aki. Lo ofrece descuento tanto di hotel pero tambe di aerolinea y mucho mas. E consumidor cu ta desea di biaha pa Aruba y probecha di e campaña por mira y cumpra tur e ofertanan aki riba aruba.com.

E mensahe di e ofertanan ta cu Aruba ta celebra e fecha internacional di felicidad no solamente riba e dia mes cu ta dia 20 di maart, pero cu ta celebra esaki durante full e luna. Pa tal motibo e mercado turistico di Latino America a wordo sorprendi ya caba cu 30 diferente oferta di hotel, restaurant, actividadnan y tarifanan special ofreci door di e aerolineanan cu ta bula den e region.

 

Expectativa pa e campaña aki ta halto y ya mas cu 5000 persona a registra pa disfruta di e oferta special.

 

Latino America ta un mercado importante pa Aruba: Na 2019 e continente aki tawata conta pa 9.5% di e total di turismo pa Aruba. Debi na e pandemia y ceramento di nos fronteranan, na 2020 e continente aki a trece 4.8% di e total di turismo pa Aruba. Pa e prome dos lunanan di 2021, Latino America a trece 4.8% di e total di bishitantenan pa nos destinacion.

 

E Dia Internacional di Felicidad mes cu ta dia 20 di maart lo lansa un video cu a wordo produci na Aruba. Pa e video aki a busca na diferente hotel e bishitantenan di Latino America pa sorprende e pareha, famia of e grupo di amistadnan cu un extended stay na Aruba. Ademas nan a wordo ofreci algun regalo mas cu A.T.A. y socionan a facilita pa e bunita momento aki.

 

Un di e ganadornan di e extended stay a invita su novia pa un viahe di sorpresa y na aeropuerto na Colombia su pareha a haya sa cu nan ta bay Aruba. Ora nan a yega Aruba nan tur dos a haya e sorpresa cu pa medio di e campaña special aki nan estadia a wordo prolonga cu dos anochi mas! Aki e guy riba su turno a dicidi pa bolbe sorpresa su pareha y riba e anochi di nan extended stay el a pidi su novia su man pa casamento. Naturalmente no a laga e oportunidad pasa pa graba e momento di felicidad aki!

 

Aruba Tourism Authority ta gradici tur socio cu a acepta e programa special aki cu sigur lo yuda pa incentiva e biahero di Latino America pa scoge Aruba como nan destinacion pa pasa nan vacacion.

Related posts

Inicio lento di turismo crucero pa aruba

EA News Author

Diferente caso den corte di prome instancia

EA News Author

Benny Sevinger (AVP): Gabinete Wever Croes a ehecuta ‘draaiboek’ di mentira contra pueblo den tres aña

EA News Author

Leave a Comment

Economia EA News