Ta gradisi Aruba Hospitality & Security Foundation
Seguridad di Aruba ta un tema di suma importancia tanto pa e residente local, como tambe e bishitantenan di e isla.
Afortunadamente, na Aruba, nos ta conta cu un nivel halto di seguridad. Segun un estudio recien cumpli pa Aruba Tourism Authority (A.T.A.), ta revela cu un impresionante 98% di bishitante for di Norte America ta considera Aruba como un destino ‘sigur’. E nivel aki di confianza no ta casualidad, sino resultado di esfuersonan dedica pa asegura e seguridad di nos bishitante. E ta grandemente mara tambe na comportacion di gran majoria di nos comunidad, kende ta para pa un isla sigur y ta consiente di e importancia di esaki! Un danki na un y tur.
Desde 2011, A.T.A. ta financia proyectonan cu ta resorta bou di “Aruba Hospitality & Security Foundation” (AH&SF). Fondonan genera pa medio di e “toeristenheffing” cu e bishitantenan ta paga durante nan estadia na un acomodacion ta wordo usa pa inverti den crea mas y mantene seguridad. Como resultado, A.T.A. tin responsabilidad pa revisa plan y accion presenta pa e fundacion di AH&SF.
Pa medio di esaki ta provee asistencia na entre otro KPA. Esfuersonan cumpli pa Cuerpo Policial KPA, cu ta inclui un forza cu ta califica como e ‘Tourism Oriented Police”, caminda cu polis riba Bicicleta ta asisti y ta rinda seguridad den e area di nos capital, Oranjestad ta un ehempel di con KPA ta brinda esfuerzo adicional na bienestar di nos turismo. Pa medio di AH&SF A.T.A. & sector di turismo ta sigui e linea aki.
Pa sostene e nivel di seguridad y sigui enfoca riba prevencion a enfoca riba mas visibilidad. Asina e introdusi e “Tourism Security Patrol Aruba”” (TSPA) cu ta opera bou di Aruba Hospitality & Safety Foundation (AH&SF). AH&SF ta un fundacion cu a wordo estableci na 2001 pa medio di Aruba Hotel and Tourism Association (AHATA) como meta pa facilita iniciativanan di hospitalidad y seguridad pa medio di colaboracion entre sector publico y sector priva.
Bou di auspicio di AH&SF por a conta cu financiamento di entre otro educacion y entrenamento, compra di ekipo manera uniform, bullet proof vests, bicicleta, radio, helm, y boto.
Banda di esaki, A.T.A. a brinda sosten na e causa di promove un Aruba sigur pa medio di entre otro , colocacion y mantencion di diferente borchi banda di nos playanan, colocacion y mantencion di bouys den nos awanan y mas.
A.T.A. ta expresa gratitud pa e colaboracion di Aruba Hospitality & Security Foundation (AH&SF), cu ta inclui representantenan di AHATA, ATSA, KPA, ATIA, y A.T.A. Kada un di e organisacionnan aki a hunga un papel vital den contribui na cada proyecto, asegurando un representacion completo.
A.T.A. ta gradici y ta felicita tur envolvi. Ta desea hopi exito tambe na e ekipo di TSPA y ta pidi comunidad completo pa brinda nan sosten na e ekipo aki!
