Den e fin di siman benidero Art Culture Education Foundation lo presenta su ultimo show pa aña 2023. E show ku titulá, “Art of Freedom” (Arte di Libertat) lo wordu presenta den dos funshon. E prome lo ta riba Djasabra 9 di Desèmber i Djadumingu 10 di Desèmber, e orario pa tur dos dia lo ta di 6or di atardi te ku 8or di anochi na Creative World.
Den Art of Freedom e hoben nan di ACE Foundation lo trese dilanti kiko pa nan ta sklabitut i libertat. E lo bira un show dinamiko ku tantu presentashon di kanto, baile, aktuashon, kombiná ku multi-media. Despues di un aña kargá ku diferente proyekto, presentashon i un interkambio kultural na Aruba, esaki lo bira e ultimo show ku ACE Foundation lo bai hasi e aña aki.
E show aki ta kulminashon di lunas di preparashon kaminda e hóben nan a haña un tour historiko di FUHIKUBO, workshop di sklabitut mental i baile serka Zoe Bernardina, lèsnan di kreador di kontenido serka Xechel Jacobs i tayérnan di drama serka Segni Bernardina. Fondonan pa realisa e proyekto aki a bini di parti di NiNsee i NGO Plataforma i ta forma parti fondonan ku a pone disponibel pa Aña di Konmemorashon Abolishon di Sklabitut.
E wikent aki ta bai bira e prome bia ku ACE Foundation lo organisa algu na su sede kreativo ku a keda duná e nòmber ACE Creative World. Creative World lo ta un sentro kaminda hoben nan por bini eksplora, diskubrí i wordu profeshonalisá den e mundu di arte. Pa aña 2024 tur loke ku wordu kreá, lo bai keda presentá prinsipalmente na Creative World.
Entrada pa show lo ta kompletamente gratis pero naturalmente ACE Foundation ta habri pa personanan ku ke hasi un donashon e wikent aki pa asina e fundashon por sigui hasi aun mas pa e hóben nan den aña 2024. Ta pidi tur hende ku ke bini e show pa registrá pa asina bo haña bo karchi di entrada digital. E wèpsait kaminda por registra ta poné riba ACE Foundation su paginá di Facebook riba e poster pa e show. Creative World ta situa den bario di Tera Cora i e ta ofisialmente enkontrabel riba Google Maps.
