Den un tono directo durante e Interparlementair Koninkrijksoverleg (IPKO), e parlamentario di Corsou pa partido PAR, Quincy Girigorie, a lansa un atvertencia structural y preocupante pa Aruba. Girigorie a desmantela e intencionnan di Den Haag cu e Rijkswet HOFA , marcando un linea cora masha cla: e pacht cu Hulanda kier pasa Aruba pa acepta no solamente ta un mal negosacion financiero, sino un menasa directo pa e sistema democratico di e isla.
Cu e autoridad di un hende cu ta biba den un pais bou di supervision financiero caba, Girigorie a haci un comparacion historico y analytical structural pa proba pakico Aruba mester para firme contra e presiona di Hulanda. Aruba su Status Aparte y e derecho cu Aruba tin for di 1986 pa goberna su mes, tuma su propio decisionnan legislativo a traves di Parlamento, y maneha su propio destino. E ta spierta cu e decisionnan cu ta tumando awor por debilita e poder di decision propio aki y duna mas control na Hulanda.
E gran diferencia: Corsou a ricibi 70% di saneamento, Aruba nada
Girigorie a splica cu control financiero riba su mes ta normal, pero e condicionnan cu Hulanda ta pone awor riba mesa pa Aruba ta totalmente desproporcional si compara nan cu loke Corsou y Sint Maarten a ricibi na aña 2010.
Ora cu Corsou y Sint Maarten a acepta e supervision financiero loke cu e islanan a cera tabata e saneamiento (cancelacion) di 70% di nan debe nacional. Esey tabata un beneficio structural enorme pa e pueblo. E tabata un prijs halto, pero tabatin un compensacion real,” Girigorie a declara.
E realidad di Aruba awor, segun e parlamentario, ta totalmente diferente y alarmante. Hulanda no ta ofrece pa cancela debe, sino simplemente un porcentahe di interes un tiki mas abao riba un fianza. Pa Girigorie, esaki ta un pacto desbalora cu no tin ningun hustificacion.
E punto mas fuerte di e atvertencia di Girigorie ta bay hopi mas aya di e parti economico; e ta toca e curason di e soberania parlamentario. E parlamentario a splica cu e pactonan aki di Rijkswet tin un “leter chikito” peligroso cu ta mara man di e mandatarionan local pa semper.
Acepta e HOFA bou di e condicionnan actual lo bay opone (primi) structuralmente riba e democracia di Aruba. E contractnan aki ta stroba Parlamento di por haci e cambionan legislativo necesario cu e mesun pais ta considera den futuro,” Girigorie a spierta
Girigorie tabata categorico den su reduccion final, catalogando e propuesta hulandes como un trampa politico caminda Aruba ta perde parti di su libertad a cambio di masha poco.
Pa un rebaho chikito di interes riba un fianza halto, mi ta kere sinceramente cu no bale la pena pa entrega bo autonomia. E ta un prijs demasiado caro pa paga,” el a sentencia.
Acepta HOFA pa un rebaho di interes ta un deal malo pa Aruba
