Minister di Salud Publico Drs. Mervin Wyatt-Ras a haci su prome bishita na HOH
Diamars, 15 di april Horacio Oduber Hospital (HOH) tabatin e grato placer pa ricibi Minister di Salud Publico, Drs. Mervin Wyatt- Ras pa prome biaha na nos facilidadnan. Un bishita pa asina cera conoci cu Hunta di Directiva di HOH, tambe algun specialista cu ta forma parti di e team medico y algun representante di management. E bishita primordialmente tabatin como meta pa duna informacion tocante unda HOH ta para awo, ki ta e plannan pa futuro y tambe dialoga tocante e diferente retonan cu ta encontra.
E bishita a cuminsa na e edificio di HOH- Academy cu un tour cortico di e facilidad sigui pa un presentacion conhuntamente cu dialogonan interesante. A toca diferente tema y a duna update di e construccion, proyectonan strategico manera e Hyperbaric Oxygen Therapy (HBOT), pero tambe e desaroyo di e sistema nobo di historia medico electronico (EPD). A papia tambe di plannan pa bin cu un helipad pa asina brinda miho asistencia na pashentnan internacional. No por lubida e piso nobo cu ta bay renoba pa pashentnan cu ta dialisa cu lo bay tin un bista hopi bunita di nos lama. Y tambe e proyecto interesante pa un centro di rehabilitacion.
A toca tambe e tema di retonan pa loke ta retencion di personal profesional y capacita. E maneho pa loke ta “vergrijzing” di populacion, fusion cu ImSan, infrastructura y sostenibilidad, cuido di emergencia y tambe e reto pa loke ta e pashentnan no documenta.
Pa finalisa tabatin un presentacion dedica na e importancia di inverti den educacion y tambe e trabounan di HOH- Academy y su rol esencial den e desaroyo di nos profesionalnan den cuido medico y tambe esnan cu ta brinda sosten pa e pashentnan por ricibi cuido di calidd.
Minister Wyatt-Ras a expresa palabra di gratitud pa e atardi ameno y alabes a menciona cu un di su puntonan di enfoke ta departamento di emergencia y alabes pa baha lista di espera.
Despues di un dialogo fructifero a sigui cu un tour na Departamento di emergencia, tambe a bishita departamento di cuido B3 sigui pa Cuido Intensivo.
HOH ta gradici Minister Wyatt Ras pa su bishita y pa su compromiso cu e sector di salud en general. Hunta di directiva di Hospital ta gradici Minister Wyatt- Ras pa su tempo, interes y ta hopi sigur di e tremendo colabracion cu lo bay tin pa hunto logra e meta pa Aruba tin un Hospital mas fuerte, cu wowo riba inovacion continuo y cu semper t’ey pa comunidad.
