Dokternan di cas na Hulanda ta organisa un dia nacional pa vocifera masalmente na Den Haag, Hulanda nan preocupacion pa nan situacion.
E dia di awe ta culmina un siman di un programa intenso pa pidi atencion pa e trabou di dokter di cas na Hulanda.
HAVA Aruba tan a altura cu na Hulanda nan coleganan a subi caya pasobra mester bin cambionan structural den e sistema cu ta evita cu den futuro e trabou di dokter di cas ta stop di existi.
Contratiempo cu ta wordo experiencia ta entre otro:
• E demanda pa cuido di dokter di cas ta subi, siendo cu e disponibilidad no ta subi den e mesun proporcion cu e demanda.
• E recompensa no ta cuadra cu e trabou cu e personal ta haci, siendo cu e trabou a bira cada biaha mas hopi.
• E presion cu e dokter di cas ta experiencia cu e 7×24 uurzorg, cu constantemente ta bira mas y tin consecuencia pa e trabou den dia di un dokter di cas.
• E dokter di cas ta e prome punto di contacto accesibel den e sistema di cuido. E sistema ta crece constantemente. Esaki ta hasi dificil y complica pa por mantene un bista completo.
• Un sistema cu ta wordo “overbelast” tin consecuencia pa e fluho di pashentnan pa cuido secundario. Pashentnan no por wordo referi lihe pa otro proveedor manera di salud mental, ouderenzorg, etc. y nan ta keda pega mas largo cu ta necesario den cuido primario.
• Structuralmente ta pidi pa e doker di cas haci mas trabou y esaki ta pone un peso extra riba e servicio cu e proveedor di cuido primario ta ofrece.
• Ta bin mas exigencia pa cu por ehempel automatisacion, responsabilisacion y participacion den diferente grupo. Esaki tin consecuencia cu tin menos tempo pa e cuido mes di pashent.
Consecuentemente, e trabou di dokter di cas ta bira menos atractivo pa haci. Dokter di cas ta stop y bay haci algo otro por ehempel.
HAVA, como e asociacion di dokternan di cas na Aruba, tambe ta para tras di e accion di e dokternan di cas na Hulanda cu a tuma luga riba 1 di juli. Nos dokternan di cas tambe ta reconoce y experiencia mayoria di e contratiempo cu nos coleganan na Hulanda ta intenta di resolve.
HAVA ta preocupa si e trabou di dokter di cas ta stop di existi. Esaki kiermen cu pashent no lo tin acceso mas na e cuido personal cu e dokter di cas ta brinda. Tambe tin HAVA su atencion e hecho cu dokter di cas no ta haya suficiente sosten den e parti financiero y manpower pa por hasi su trabou debidamente. Consecuentemente, ta wak dokter di cas ta kies cu dolor den nan curazon pa continua na un otro pais.
Pesey HAVA tambe ta sostene e accion di awe: Ik wil voor iedereen een huisarts, nos kier pa tur hende tin un dokter di cas.