Departamento di Impuesto a emiti un alerta urgente pa adverti publico Arubiano tocante un intento di estafa digital cu ta circula via SMS, den cual personanan no- autorisa ta haci uzo ilegal di e nomber y logo di e institucion.
Segun e departamento, e mensahenan falso ta intenta convence contribuyentenan pa “no perde tempo” y pidi nan restitucion fiscal digitalmente. Den e SMS tin un link cu ta hiba usuario na un formulario falso, diseña pa tuma informacion personal.
Departamento di Impuesto a enfatisa cu e mensahenan aki NO ta sali for di nan oficina y cu e situacion ta trata di un scam, actualmente bou investigacion di autoridadnan competente.
E institucion ta pidi cu insistencia pa tur hende NO habri e link, y si algun hende ya a habri e, pa no yena ningun dato den e formulario. Segun e advertencia, esaki por pone data sensibel na riesgo pa yega na man di personanan cu mala intencion.
E departamento a recorda tambe cu nan NUNCA ta pidi informacion personal via SMS of e-mail cu link na formularionan externo. Ta recomenda semper pa verifica informacion directamente cu Departamento di Impuesto antes di subi of comparti cualke dato.
Finalmente, Departamento di Impuesto ta pidi pa e advertencia wordo comparti cu famia y conoci pa preveni mas victima. “Ta fundamental pa evita cu datonan confidencial cay den man di criminalnan cibernetico cu ta uzando nos nomber y logo sin permiso,” segun e comunicado.
Departamento di Impuesto ta alerta riba un intento di scam via SMS
