E situacion reinante na Aruba ta algo cu ciudadanonan na otro paisnan di mundo tambe ta experiencia. Prijsnan halto cu ta afecta e presupuesto familiar grandemente.
Unda cu bay ta scucha e mesun kehonan. Famianan cu tabata recientemente di biahe na Colombia a bisa cu bida ta masha caro mes; prijsnan a subi drasticamente. No asina hopi pa loke ta wordo produci localmente.
For di Hulanda tambe nos a haya hopi comentario. No solamente for di Hulandesnan pero tambe Arubianonan residencia na Madre Patria. E situacion reinante di prijsnan halto a pone cu a cuminsa busca tur rond riba unda tin miho y mas. Asina por a constata cu hopi Hulandes y Arubiano ta biaha pa paisnan bisiña Belgica y Alemania unda principalmente e prijs di gasolin ta mas barata cu na Hulanda. Por ehempel, na Hulanda e liter di gasolin ta costa 3,86 florin, mientras cu esnan cu crusa frontera pa cumpra gasolin ta paga 3,24 florin. E diferencia no t’asina grandi, pero ta bay pa haci mas compras.
A constata cu na Belgica y Alemania en general prijsnan ta hopi mas barata cu na Hulanda tambe. Asina ta papia por ehempel di paña, materialnan pa uzo den cas (electrodomestico), pero tambe material pa construccion di cas. Esaki ta causa cu ta bira hopi mas atractivo pa haci compra grandi na e dos paisnan menciona.
E ta un forma innovativo pa sobrevivi den e situacion actual mundialmente, mientras cu ta spera cu e situacion bay bek un poco manera antes. Y probablemente entrante otro luna caba lo por cuminsa sinti poco alivio. Tur cos ta indica cu pa otro luna lo por sinti un reduccion basta bon den prijs di gasolin y diesel. E reduccion di prijs di combustibel lo tin efecto riba prijs di hopi producto, principalmente pa Aruba cu ta depende pa casi 100% di produccion di pafo di Aruba.
Pues aki na Aruba mester cuminsa wak rond tambe riba e miho forma pa anda cu prijsnan, entre otro comerciantenan uni den importacion di productonan cu lo por yuda baha prijsnan final.
