Recientemente a sali na bista cifranan alarmante tocante e salud di nos comunidad. Segun datonan comparti, no menos cu 46% di e poblacion na Aruba ta wordo considera obeso. E realidad aki ta bati na porta di instancianan di salud, urgiendo un cambio di direccion unda cu prevencion mester bira e prioridad principal pa garantisa un futuro mas saludabel pa e ciudadano.
Segun Minister di Salubridad Publico Mervin Wyatt Ras Guia y remedi mester ta como herment di apoyo.Un di e pasonan concreto cu a wordo tuma ta e decision pa reinstitui e “pakket” di medicina completo. E meta tras di esaki no ta solamente pa suministra remedi, sino pa uza esaki como un punto di entrada pa guia e ciudadano den un direccion mas preventivo. “Nos mester busca alternativanan cu ta yuda nos ciudadanonan realmente,” Minister di Salud Publico Mervin Wyatt Ras a splica, resaltando cu e combinacion di e remedi necesario cu un guia structural ta loke lo marca e diferencia.
Lucha contra propaganda di cuminda “junk” ta un realidad.Un di e reto nan mas grandi cu a wordo identifica ta e cantidad enorme di propaganda cu e ciudadano ta wordo expone na dje diariamente. Mensahenan cu ta stimula consumo di productonan manera chips, batata hasa y hamburger ta tur caminda, locual ta haci e escogencia pa un bida saludabel hopi mas dificil.
Pa contraresta esaki, e programa nobo ta busca pa duna e ciudadano e “tools” of hermentnan necesario pa e mes por dicidi riba su futuro. E idea ta cu, door di brinda un structura y educacion, e persona por resisti e presion di mercadeo y opta pa loke ta miho pa su curpa.
Aunke na principio tabatin hopi skepticismo y duda si un programa asina lo tabatin resultado, e realidad awor ta mustra otro. Ciudadanonan mes ta bini dilanti pa expresa cu e apoyo y e guia aki tin un efecto positivo riba nan bida. Esaki ta confirma cu tin un necesidad grandi pa programanan cu no solamente ta cura sintoma, sino cu ta ataca e raiz di e problema: e falta di prevencion y e aumento den cifranan di obesidad.
Cu casi mita di nos poblacion enfrentando problemanan di peso, e yamada ta keda cla: e enfoke riba prevencion no ta un opcion mas, sino un necesidad urgente pa e bienestar di Aruba.