Minister di cultura tabata presente na e actividad final di e celebracion di dia di Aruba na scol dun’ un man
Diabierna mainta Minister Xiomara Maduro di Cultura tabata presente na Scol Dun’ un man pa presencia e actividad final cu e muchanan y nan maestro a prepara riba e tema Aruba. Un bunita actividad di e scol pa clausura e luna cultural di maart den cual nos ta celebra nos Dia di Himno y Bandera.
Cada klas a traha riba un epoca cu Aruba a pasa aden. Asina por a mira e muchanan bisti na indjan hiba nos bek den tempo na aña 1636 ora cu e Spaño Alonso de Ojeda a yega Aruba. Nos por a mira Aruba tempo cu a descubri oro y mas den presente ora nos muchanan a canta y baila manera ‘turista riba nos isla’. Minister Maduro a disfruta di cada presentacion cu nos muchanan a haci masha unico.
E mandatario ta gradici cabesante Sharline Geerman -Rodriguez pa e invitacion y ta gradici tur maestro di Scol Dun’ un man pa tur esfuerso y bunita guia cu nos muchanan a haya pa por a haci nan presentacion na honor di Aruba. Masha danki pa scohe e tema Aruba pa nos muchanan por haya sa mas di nos historia, nos custumbernan y pa cultiva e amor pa Aruba den nan mente y curason.
