Awe mainta, Hues di Corte di Husticia a dicta sentencia den e caso penal cu Ministerio Publico a cuminsa contra e homber D.E. (29). Hues ta haya D.E. culpabel.
Por a compronde cu Hues ta haya e castigo exigi di Fiscal esta 5 aña di prison comprendibel, mirando e seriedad di e caso. Sinembargo Hues a impone un castigo pa D.E. cu ta nifica cu pa 9 aña largo D.E. ta keda bou vigilancia di Ministerio Publico.
Den sala di Corte por a mira cu e damanan B. y T. tabata presente mientras cu via video conference e dama S. na Hulanda tabata scucha e decision di Hues.
CULPABEL
Hues den su evaluacion ta bisa cu e ta haya legalmente proba cu D.E. a hack cellular y chantagea e dama B. Hues a bisa cu no tin prueba cu D.E. a hack e cellular di T. pero si cu D.E. a chantagea T. Pa loke ta violacion di e dama S., Hues a bisa cu abogado mr. Illes a bisa cu mester declara D.E. liber. Hues ta haya cu D.E. a viola S. Hues ta haya e declaracionnan di S. confiabel y consistente. Hues ta haya cu S. a duna suficiente detayes kico a sosode y cu tin prueba di sosten. Hues a mustra cu tin yamada telefonico y ta menciona D. Hues a bisa cu segun D.E. e yamadanan ta fabrica pa asina presiona D.E. pa no papia cu S. lo tabata forma parti di grupo cu ta hack. Hues a bisa cu e no ta kere esaki.
CASTIGO
Hues a bisa cu Fiscal a exigi 5 aña di prison y esaki ta comprendibel mirando e seriedad di e caso.
Pa cu e castigo, Hues a bisa cu e ta tene cuenta cu pa añanan largo D.E. a presiona y chantagea e damanan pa e haya mas potretnan sunu di nan of e lo publica e potretnan cu e tin di nan. Hues a sigui bisa cu D.E. no a keda te esaki. El a viola e dama S.
Hues a bisa cu D.E. a perhudica e tres damanan. Hues ta haya cu mester manda un señal bon cla cu no ta tolera hacking y chantagea hende.
Hues a bisa cu e ta tene cuenta cu e situacion di D.E. caminda psychiater y psycologo ta mustra cu D.E. tin problema mental y ta menos responsabel pa su actonan. Psychiater y psycologo ta mustra cu D.E. mester haya tratamento pero no interna den un institucion. Hues a bisa cu den Corte psychiater y psycologo a bisa cu D.E. mester 2 pa 3 aña di tratamento ambulante. Hues ta haya cu mester evita cu D.E. ta crea mas victima. Mirando tur esaki, Hues ta haya importante cu D.E. mester haya tratamento debido.
9 AÑA BOU VIGILANCIA
Hues no a sigui exigencia di Fiscal di 5 aña di prison, aunke e ta haya esaki comprendibel. Hues a impone un castigo cu en total ta nifica cu durante 9 aña, D.E. ta keda bou vigilancia di Ministerio Publico.
Hues a condena D.E. na 48 luna di prison (4 aña), di cual 6 luna ta condicional cu un tempo di prueba di 5 aña. Hues ta obliga D.E. pa tuma tratamento. Hues a bisa cu di e forma aki, ta crea un periodo di 9 aña cu D.E. ta keda bou vigilancia di Ministerio Publico.
MESTER PAGA DAÑO
Hues a bisa cu e ta aproba mas di 2 mil Euro di daño pa e dama S. na Hulanda. Hues a declara no admisibel e otro demandanan di S. pasobra Hues ta haya cu nan no ta suficiente splica. Pa loke ta daño inmaterial, Hues a aproba 15 mil florin y si D.E. no paga e lo mester bay 60 dia cera. Tambe mester paga gastonan di abogado calcula na 1000 florin.
Hues a bisa cu pa e dama T., gran parti di e demanda lo wordo aproba cu ta den careda di 17 mil florin. Aki tambe si D.E. no paga e lo mester bay 60 dia sera.
PROHIBI PA PAPIA CU VICTIMANAN
Hues a prohibi D.E. pa comunica den cualkier forma cu e victimanan T., B. y S.