Mientras e debate rond di e Rijkswet Aruba Financieel Toezicht (HOFA) ta continua, un punto crucial ta bini dilanti cu ta pone e maneho di e coalicion AVP-FUTURO bou di un lupa critico: e natura “no bindend” di e Bestuurlijk Akkoord. Analistanan ta cuestiona pakico Minister Gerlien Croes y e liderazgo di e coalicion a opta pa capitula dilanti Hulanda, siendo cu legalmente nan tabatin e espacio pa negosha un mihor deal.
E Mito di e “Feter Mara”
E nucleo di e polemica ta sinta den e falta di malicia politico den e negosacionnan cu Den Haag. Un Bestuurlijk Akkoord, pa su natura juridico, no ta un obligacion legal cu ta mara man di e siguiente gobiernonan irrevocablemente. Esaki nifica cu e coalicion actual, lidera pa Mike Eman, Gerlien Croes y Geoffrey Wever, tabatin e herment legal pa renegosha e terminonan prome cu a entrega e autonomia financiero di nos pais.
En bes di a uza e espacio aki pa para firme pa Aruba, e ministernan encarga ta wordo acusa di a actua di forma “naief”. y acepta exigencianan sin un lucha legal debido, nan a transforma un documento cu no tabata obligatoriamente mara, den un feter cu awas ta strangula e autonomia nacional.
Oportunidad vs. Capitulacion
Profesionalnan den e materia ta bati alarma riba e echo cu, legalmente, Aruba no tabata obliga na e terminonan actual si tabatin e boluntad politico pa negosha cu sabiduria di un “adulto politico”. E pregunta cu ta keda den aire ta: Pakico a scoge pa e caminda facil?
- Falta di Vision: E “sapato di mando” a keda hopi grandi pa Minister Gerlien Croes?.
- Interes Financiero: Ta parce cu a sacrifica autonomia a largo plaso djis pa un fabor financiero inmediato?, loke hopi ta considera un “blunder” diplomatico di magnitud historico.
Un Ministerio sin Base Legal
E situacion ta bira mas delicado ora cuestiona e legitimidad di e mandatario encarga. Minister Gerlien Croes ta actua como “Minister di Relacionnan di Reino”, un posicion cu legalmente no ta existi den e Ley di Institucion di Ministerio (LIM) cu ainda no ta firma pa Gobernador.
E falta di transparencia aki ta lanta dudanan serio: Con un mandatario cu ta den un posicion legalmente cuestionabel por negosha e futuro di nos autonomia? Den Parlamento, ya ta papia abiertamente di un “ganjado patologico” cu ta biba den un “mundo di fantasia”, leu di e realidad constitucional di Aruba.
Conclucion: E Herencia di AVP-FUTURO
Si no tin un rectificacion urgente, e capitulo aki lo sella e historia di e coalicion AVP-FUTURO como e gobierno cu a entrega e mando di Aruba na Hulanda. E uzo di e “Bestuurlijk Akkoord” como un excusa pa no lucha pa un mihor trato ta wordo bisto como e prueba final cu e gobierno aki a faya den su deber di protege e pueblo Arubiano, optando pa keda bon cu Hulanda en bes di para firme pa nos mesun derechonan.