Awor cu Raad van Advies a confirma cu e proposicion di Rijkswet HOFA, presenta pa gobierno
AVP y FUTURO, ta mishi directamente cu e autonomia di Aruba, e debate politico ta cambia di
tono. Esaki ya no un discusion mas entre oposicion y gobierno, esaki ta un señal institucional cu
Aruba mester tuma awor hopi na serio y actua riba dje.
Lider di fraccion di PPA, Eduard Pieters, ta expresa fuertemente sin keda draai rond: “Awor no
tin mas excusa. Ora e institucionnan independiente confirma e preocupacionnan aki, keda keto
ta bira complicidad.”
For di cuminsamento, PPA a adverti cu HOFA ta un ley cu ta bay mas leu cu disciplina financiero.
Ta trata di poder. Ta trata di control. Ta trata di e derecho di Parlamento di Aruba pa determina
su propio rumbo financiero, sin intervencion externo.
Awor cu Raad van Advies ta valida esaki, e pregunta no ta mas si acaso tin problema, paso e
pregunta ta bira: “Ken tin e curashi pa enfrenta e realidad?”
Gobierno no por sigui trata esaki manera un proceso tecnico of djis algo di politico partidario.
Esaki ta un asunto nacional y e falta di accion awor lo ta interpreta como un decision: un
decision pa acepta un debilitacion di nos posicion dentro di Reino.
PPA ta haci un yamada fuerte y directo: laga boso color di partido un banda, laga calculacion
politico un banda, supera tur ineres individual y ban hunto forma un frente nacional.
No pa confronta Hulanda, pero pa negosha cu dignidad y claridad. No pa crea conflicto, pero pa
evita cu Aruba ta perde tereno, sin lucha.
Un Reino fuerte no ta construi riba ley cu ta impone control, sino riba respet mutuo entre e
paisnan autonomo. Y respet no ta algo cu bo pidi, bo mester exigie cu un bos unifica.
Esaki ta e momento cu lo defini con Aruba lo ta para den e añanan cu ta bin. “Dividi, nos ta
debil. Uni, nos tin hopi mas poder.” Eduard Pieters ta remarca. Awor ta e ora pa mustra cu
Aruba no ta negosha su autonomia, ni den silencio, ni den division.
Eduard Pieter, lider di fraccion PPA: “Awor cu Raad van Advies ta sostene nos posicion contra HOFA, ta momento pa forma un frente nacional!”
